असार १८ काठमाण्डौं । नेकपा भित्रको विवादले गंभीर मोड लिईरहेका बेला आज प्रधानमन्त्री तथा पार्टी अध्यक्ष केपी ओली नै नआए पछि नेकपा स्थायी समितिको बैठक प्रचण्डले शुरु गरेका थिए । तर त्यही बेला संसदको चालु अधिवेशन अन्त्य गर्ने निर्णय भयो भन्ने खबर आए पछि बैठकमा हलचल मच्चिएको थियो ।
त्यस पछि प्रचण्डले यस बिषयमा प्रधानमन्त्रीसगँ आफूले कुरा गर्ने भनेर बैठक रोकिएको एक नेताले बताएका छन् । त्यस पछि पनि ओली बैठकमा आउन नमाने पछि स्थायी समितिको बैठक रोकेर अहिले ओली, प्रचण्ड, माधव नेपाल,वामदेव गौतम, विष्णु पौडेल सहितका नेताहरु छलफलमा जुटेको खबर छ ।
११ बजे बस्ने भनेर बोलाईएको बैठकमा आउनुको साटो प्रधानमन्त्री ओली राष्ट्रपतिलाई भेट्न गएर एक घण्टा पछि आएका थिए । त्यस पछि उनले मन्त्रीपरिषद्को बैठक बोलाएर संसदको चालु बजेट अधिवेशन अन्त्यको निर्णय गराएका छन् । त्यस पछि पनि उनी बैठकमा आएनन् ।
सवा घण्टा अध्यक्ष ओलीलाई कुर्दा पनि नआए पछि अर्का अध्यक्षले बैठक शुरु गरेका थिए ।