असार १७ काठमाडौँ । लामो विवाद र रस्साकस्सीका बीच केही दिन यता जारी नेकपाको स्थायी समितिको बैठक आज एक घण्टा मात्रै बसेर स्थगित भएको छ ।
बालुवाटारमा बसेको पाँचौं दिनको बैठक एक घण्टा बसेर स्थगित भएको प्रवक्ता नारायणकाजी श्रेष्ठले बताए ।
कांग्रेस सांसद ज्ञानकुमारी छन्त्यालको निधनमा संघीय संसद्को बैठकमा शोक प्रस्ताव पारित गर्ने कार्यक्रम तय भएपछि त्यसमा सांसदहरु सहभागी हुनुपर्ने भन्दै बैठक स्थगित गरिएको प्रवक्ता श्रेष्ठले बताए ।
बैठकमा आज बोल्ने ४ जनाले पनि हिजो बोल्ने नेताहरुले जस्तै प्रधानमन्त्री ओलीको राजीनामा माग गरेका छन् । आज बोल्नेमा राजीनामा नमाग्नेमा योगेश भट्टराई एक्लै थिए ।
भट्टराईले भने पार्टीलाई एकतावद्ध बनाउनु पर्नेमा जोड दिदै राजीनामा नमागेको एक नेताले बताए । उनी बाहेक लिलामणि पोखरेल, मातृका यादव, एनके प्रसाई र पेशल खतिवडाले राजीनामा मागेका थिए ।
यस अघि हिजो प्रचण्ड, माधव कुमार नेपाल, झलनाथ खनाल, वामदेव गौतम सहित १७ नेताले राजीनामा मागेका थिए ।
अर्को बैठक बिहीबार बिहान ११ बजे बस्ने भएको छ ।