असार ६ काठमाण्डौं । सत्तारुढ नेपाल कम्युनिष्ट पार्टी नेकपा को सचिवालय बैठकले प्रस्तावित नागरिकता सम्बन्धी विधेयकमा वैवाहिक अंगीकृत नागरिकता प्राप्त गर्न विवाह भएको सात वर्ष पूरा भएको हुनुपर्ने व्यवस्था राख्ने गरी विधेयक अघि बढाउने निर्णय गरेको छ ।
बालुवाटारमा बसेको नेकपाको सचिवालयको बैठकले यस्तो निर्णय गरेको प्रवक्ता नारायणकाजी श्रेष्ठले जानकारी दिनु भयो ।
लामो समयदेखि प्रतिनिधिसभा, राज्य व्यवस्था तथा सुशासन समितिमा छलफल भइरहेको सो विधेयकबारे समितिमा सहमति जुट्न नसकेका स्थितिमा नेकपाले आफ्नो धारणा स्पष्ट गरेको हो ।
समितिमा उक्त प्रावधान राख्न प्रस्ताव आएकामा विपक्षी दलले त्यति लामो अवधि राख्न नहुने बताउँदै आएका छन् । नेकपाको बैठकपछि सो पार्टीका प्रवक्ता नारायणकाजी श्रेष्ठले त्यस्तो नागरिकता प्राप्त गर्न ती व्यक्तिले सम्बन्धित देशको नागरिकता परित्याग गरेको प्रक्रिया आरम्भ गरेको हुनुपर्ने पनि निर्णय गरिएको बताउनुभयो । यसै गरी नेपाली महिला बिबाह गर्ने विदेशीहरुलाई भने नागरिकता नदिने पनि नेकपाले निर्णय गरेको छ ।
यस अघि राज्य व्यवस्था समितिले पाँच दिन भित्र सहमति गर्न निर्देशन दिएको थियो ।
काँग्रेस, समाजवादी लगायतका पार्टीहरु भने यो विधेयकको व्यवस्था हटाएर अन्तरीम सविधानमा उल्लेख भए अनुसार नै अघि बढ्नु पर्ने पक्षमा छन् ।
अन्तरीम संविधानमा गरिएको व्यवस्था अनुसार नेपालमा बिबाह गरेर आउने महिलाले अंगीकृत नागरिकता प्राप्त गर्नका लागि कुनै समयसीमा तोकिएको छैन ।