जेष्ठ २६ अछाम । महामारीका बेला अस्पतालले जागिरबाट निकाले पछि रोजीरोटीकै पीडामा अस्पताल पुग्दा उल्टै हप्की दप्की र प्रहरीनै लगाएर निकालिए पछि आत्मदाहका लागि शरीरमा आगो लगाएका अछामका सिद्धार्थ आउजीको मृत्यु भएको छ ।
आज बिहान पेट्रोल छर्केर आफ्नै शरीरमा आगो लगाएका बयालपाटा अस्पतालका कर्मचारी सिदार्थ आउजीको मृत्यु भएको छ । सोमबार बिहान अस्पतालको गेटमा गएर आफ्नो शरीरमा आगो लगाएपछि उनलाई भेरी अस्पताल नेपालगन्जमा हेलिकप्टर मार्फत पुर्याईएको थियो । अस्पताल पुर्याएको आधा घन्टामै उनको मृत्यु भएको अस्पताल स्रोतले जनाएको छ ।
सिद्धार्थ बलयपाटा अस्पतालको शौचालय सरसफाई गर्ने गर्दथे ।
अस्पतालले आर्थिक संकट भएको भन्दै उनी लगायत ३२ कर्मचारीलाई अस्पतालबाट निकाल्ने सूचना करार सम्झौता सकिनु दुई महिनादेखि जानकारी गराएका थिए ।
दलित समुदायका सिद्धार्थको आर्थिक अवस्था कमजोर छ। बिनाकारण जागीरबाट हटाइएपछि परिवार कसरी पाल्ने भन्ने चिन्तामा थिए उनी। बुवा आमा नोकरीको सिलसिलामा भारतमा छन्। उनको एक ४ वर्षको छोरा, दश महिनाकी एक छोरी र श्रीमती छन्। उनले पटक पटक अस्पतालमा कामबाट हटाइए आत्महत्या गर्ने चेतावनी दिँदै आएका एक जना कर्मचारीले बताए। तर अस्पतालले बेवास्ता गर्दा यस्तो परिस्थिति आएको उनले बताए।
उनले जागिरबाट निकालिएर घर चलाउन नसकेको पीडामा आफैलाई जलाउदा अन्ततः जीवनै गुमाउन पुगेका छन् ।
