पर्सा, १३ जेठ । वीरगंज उपमहानगरपालीकास्थित गण्डक अस्पताल (कोरोना विशेष अस्पताल)मा उपचाररत २१ जना काेराेना संक्रमित निकाे भएर मंगलवार राति नै घर गएका छन् । चार महिलासहित २१ जनालाई मंगलबार राति करिब साढे १० बजे डिस्चार्ज गरिएकाे हाे ।
डिस्चार्ज हुनेहरूमा ४ जना महिला, ३ जना साढे २ बर्ष, चार बर्ष , दस बर्षका बालक र १४ जना पुरूष रहेकेा काेविड विशेष अस्पतालकाे प्रमुख डा. उदयनारायण सिंहले जानकारी दिनुभयाे ।
उनीहरूकाे पछिल्लो दुई पटक गरिएकाे पीसीआर परिक्षण रिपाेर्ट नेगेटिभ आएपछि डिस्चार्ज गरिएकाे डा. सिंहले बताउनु भयाे । ‘दुई जना बालबालिका सहित २१ जना कोरोना संक्रमित निको भएर डिस्चार्ज भएका छन,’ डा. सिंह भन्नुभयाे, ‘डिस्चार्ज हुने सबै वीरगंज महानगरपालिकाका बासिन्दा हुन् ।’
गत वैशाख २७ र ३० गते कोभिड- १९ पुष्टि भएदेखि उनीहरूलाई आइसोलेसनमा राखिएको थियो । नारायणी अस्पतालको आइसोलेसन वार्डमा बेड अभाव भएकाले २१ जना संक्रमितलाई संक्रमण भएको पहिलो २ दिन घरमै सेल्फ आइसोलेसनमा राखेको थियो ।
त्यसपछि संक्रमितलाई सिद्धार्थ माध्यमिक विद्यालयलाई सेमी आइसोलेसनमा परिणत गरी त्यहीं राखिएको थियो । वीरगंज महानगरपालिकाले यहाँको गण्डक अस्पताल सँग सम्झौता गरी त्यसलाई अस्थायी कोभिड अस्पताल बनाएपछि गत वैशाख ७ गते सिद्धार्थ माविको सेमी आइसोलेसनबाट २१ जना संक्रमितलाई सारिएको थियो ।
डा. सिंहका अनुसार २१ जना डिस्चार्ज भएपछि उक्त अस्पतालमा अब ९ जना कोरोना संक्रमित उपचारतत छन् । उनीहरूमा पनि कोरोनाको कुनै लक्षण देखिएको छैन । स्वास्थ्य अवस्था सामान्य रहेको बताउनु भयो । यसअघि नारायणी अस्पतालको आइसोलेसन वार्डमा भर्ना भएका ७२ जना कोरोना संक्रमित निको भएर घर फर्किसकेका छन् ।
उनीहरु अस्पतालबाट डिस्चार्ज भएपछि हिडेरै घर गएका छन् । रातको समयमा डिस्चार्ज गरिएका उनीहरुका लागि अस्पतालबाट घर जान कुनै सवारी साधनको सुविधा उपलब्ध गराईएको थिएन ।
