झापा, ११ जेठ । नेत्र विक्रम चन्द विप्लव नेतृत्वको नेपाल कम्युनिस्ट पार्टी मेचि-कोसी ब्युरो इन्चार्ज तथा पुर्व सांसद नेतृ उमा भुजेल आज झापा जिल्ला अदालतमा १ लाख धरौटि बुझाएर रिहाइ भए लगत्तै प्रहरीले उनलाई पुनः पक्राउ गरि धनुषा लाने तयारी गरेको छ।
अदालत परिसरबाट हाम्रो सम्पर्कमा आएकी नेतृ भुजेलले जिल्ला अदालत झापाले रिहाइ गरेपनि प्रशासनले आफुलाई दोस्रोपटक गिरफ्तार गरि धनुषा लाने तयारी गरेको जानकारी गराइन। भुजेलका अनुसार उनलाई प्रशासनले आन्तरिक कारण देखाउँदै भोलिमात्र धनुषा लाने जानकारी गराएको र आज झापा कारागारमा नै राखिने छ।
नेतृ भुजेललाई प्रहरीले गत पुस १२ गते सुनसरीको चक्रघट्टिबाट कार्यलय सचिव सुमनसिंह पौडेल सँगै गिरफ्तार गरि सुनसरी राखेको थियो। यसअघि सुनसरी जिल्ला अदालत इजलास नम्बर २ मा भएको थुनछेक बहसपछि जिल्ला न्यायधिस धर्मराज पौडेलको एकल इजलासले नेतृ भुजेल र पौडेललाई जनही १० हजार धरौटीमा रिहा गरेपनि उनीहरुलाई प्रहरीले पुनः पक्राउ गरी झापा ल्याएको थियो । यसअघि सँगै पक्राउ परेका सुमनसिंह पौडेललाई २ लाख २५ हजार धराैटि तिरेर झापाबाट रिहा भएलगत्तै प्रहरीले पुनः पक्राउ गरि सुनसरी लगेको छ।
तत्कालीन माओवादीका तर्फबाट गोर्खा जेल ब्रेक गर्ने महिला सदस्य तथा पुर्व सांसद समेत रहेकि नेतृ भुजेलको टोलिले २०५७ चैत्र १७ गते गोर्खा जेल व्रेक गरेको थियो ।
चन्द्रगढी कारागारमा अझै धरौटी बुझाउन नसकेर नेतृ भुजेल भन्दा अगाडि नै पक्राउ परेका सुनसरीका सेक्रेटरी सन्तोष विष्ट, र झापाका प्रवीण मिश्र लगायतका बाँकी रहेका छन् ।