काठमाण्डौं जेष्ठ ७ । उत्तेजनात्मक र आक्रामक समाचारहरु पस्कन सिपालु भारतीय मिडियाहरुले नेपालले कालापानी, लिपुलेक र लिम्पियाधुराको मुद्धामा लिएको अडानदेखि कोरोना भाईरस सम्म जोडेर नेपालको उछितो काढ्न थालेका छन् । उनीहरुले आक्रमणको निशानामा प्रधानमन्त्री केपी शर्मा ओलीदेखि नायिका मनीषा कोईराला सम्मलाई बनाएका छन् ।
शुरुमा मनीषा कोईरालाको एउटा ट्वीटलाई लिएर समाचार अन्तरवार्ता समेत प्रशारण गरेको भारतीय मिडियाले कोईरालालाई भारतको दाना पानी खाएर चीनको गीत गाएको सम्म आरोप लगाएका थिए ।
तर अहिले साझँ आजतक टेलिभिजन देखि नवभारत टाईम्स, अमर उजाला सहितका हिन्दी तथा अग्रेजी सञ्चार माध्यमले कोरोना भाईरसको प्रसारमा प्रधानमन्त्रीले सदनमा दिएको अभिव्यक्ति र कालापानी लिपुलेकको बिषयमा समेत टिप्पणी गरेका छन् ।

आजतकले नेपालको प्रधानमन्त्रीले फेरी एक पटक बिष बमन गरेको भन्दै नेपालमा चीन र ईटाली भन्दा पनि खतरनाक भाईरस भारतबाट आएको भनेको बिषयमा टिप्पणी गरेको छ ।
भारतबाट अवैध रुपमा नेपाल आउनेहरुबाट भाईरस प्रसार भएको , भारतबाट आएको भाईरस कडा भएको जस्ता अभिव्यक्तिले भारतीय अधिकारी असन्तुष्ट बनेको र दुबै देशको सम्बन्ध थप तनाबमा परेको आजतकले लेखेको छ ।

यस्तै अमर उजालाको अनलाईन संस्करणले नेपालको प्रधानमन्त्रीको बोली बिग्रीयो, भने भारतबाट आएको भाईरस चीन र ईटालीको भन्दा घातक शीर्षकमा समाचार लेखेको छ भने लिपुलेकका बारेमा पुरानै राग अलापेको भनेर टिप्पणी गरेको छ ।
नवभारत टाईम्सले भारतको बिरोध पछि पनि नेपालले आफ्नो नयाँ राजनीतिक नक्सा जारी गरेको भन्दै परिस्थिति निकै गंभीर भएको उल्लेख गरेको छ ।
यस्तै टाईम्स अफ् ईन्डियाले विदेश मन्त्रालयको हवला दिदै नेपालले विस्तार गरेको नक्सा क्रित्रिम भएको र त्यो स्वीकार्य नहुने चेतावनी भारतले दिएको लेखेको छ ।
