काठमाडौं, ६ जेठ । मंगलबार एकै दिन २७ जनामा कोरोना पुष्टि भएकाे छ । याे सँगै नेपालमा कोरोना संक्रमितको संख्या ४०२ पुगेको छ।
स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार मंगलबार एकै दिन २७ जना नयाँ संक्रमित भेटिएका हुन् । नयाँ संक्रमितहरूमा १७ वर्षदेखि ४२ वर्ष उमेर समूहका छन् ।
संक्रमितमध्ये २४ पुरुष र तीन महिला रहेकेा मन्त्रालयले जनाएकाे छ । झापाको ९, मोरङ र सुनसरीको एक-एक, सर्लाहीको दुई, काठमाडौंको तीन, भक्तपुरको एक, मकवानपुरको एक, रामेछापको एक, ललितपुर एक, सिन्धुली एक, लम्जुङको एक, कपिलवस्तुको चार र नवलपरासीको एक गरी जम्मा २७ जनामा मंगलबार संक्रमण पुष्टि भएको हो ।
जम्मा संक्रमित ४०२ मध्ये ३४० पुरुष र ६२ महिला छन् । आज भेटिएकाहरूकाे कन्ट्रयाक ट्रेसिङको काम सुरु भएको देवकोटाले जानकारी दिए ।
अहिलेसम्म नेपालमा पीसीआर विधिबाट ३२ हजार ६ सय ४ र आरडीटी विधिबाट ७४ हजार ६ सय ४९ जनाको परीक्षण भएको छ। पछिल्लो २४ घण्टामा पीसीआर विधिबाट दुई हजार दुई सय ८० र आरडीटी विधिबाट पाँच हजार ८९ जनाको नमुना परीक्षण गरिएको छ।
२१ हजार ६ सय २३ जना क्वारेन्टाइनमा छन्। उपत्यकामा १७ र बाहिर ४४० गरेर आइसोलेसनमा ४ सय ५७ जनालाई राखिएको प्रवक्ता देवकोटाले जानकारी दिए । मंगलबार विराटनगरस्थित कोसी अस्पतालमा उपचार गराइरहेका झापाका ६२ वर्षीय पुरुष डिस्चार्ज भएका छन्। योसँगै डिस्चार्ज हुनेको संख्या ३७ पुगेको छ।
काठमाडौंका विभिन्न स्थामा नमुना परीक्षण गर्दा काठमाडौंका कालिमाटी, सफाइ कर्मचारी, गोगंबु क्षेत्रमा भएका परीक्षणमा सबै रिपोर्ट नेगेटिभ आएको प्रवक्ता देवकोटाले जानकारी दिए।