वैशाख १४, काठमाडौँ । नेपालमा कोरोना संक्रमण पुष्टि भएका मध्ये १६ जना निको भएर घर फर्किएका छन् । आइतबार थप ४ जना निको भएर घर फर्किएसँगै निको हुनेको संख्या १६ पुगेको हो।
आइतबार स्वास्थ्य तथा जनसंख्या मन्त्रालयले आयोजना गरेको नियमित मिडिया ब्रिफिङका क्रममा मन्त्रालयका प्रवक्ता डा विकास देवकोटाले नारायणी अस्पतालमा उपचाररत रौटहटका १९ वर्षीय युवक १२ औँ दिनमा र भारतीय धर्म प्रचारक जमाती समूहका ३ जना पुरुष१५ औँ दिनमा निको भएर घर फर्किएको बताए।
यस्तै,आइतबार थप २ जना नयाँ संक्रमित भेटिएपछि कोरोना संक्रमितको संख्या मुलुकभर ५१ पुगेको छ ।
संक्रमतिमध्ये धनगढीमा १ जना, वीरगन्जमा ३ जना, भरतपुरमा १ जना र विराटनगरमा ३० जना उपचाररत रहेका छन्। सबैको स्वास्थ्य अवस्था सामान्य रहेको मन्त्रालयले जनाएको छ।
त्यस्तै शनिबारसम्म नेपालमा आरडीटी विधिबाट ४१ हजार ४ सय ३६ नमुना परीक्षण भएका छन् भने पीसीआर विधिबाट ९ हजार ९ सय ३१ परीक्षणहरु भएका छन्। कुल दुवै विधिबाट ५१ हजार ३ सय ६७ वटा परीक्षणहरु भएका छन् ।
हाल मुलुकभर आइसोलेसनमा ११० जना रहेको मन्त्रालयले जनाएको छ। काठमाडौँमा ६ जना आइसोलेसनमा छन् भने उपत्यका बाहिर १०४ जना रहेका छन्। क्वारेन्टाइनमा १७ हजार २५ जना रहेको मन्त्रालयले बताएको छ।