काठमाडौं, चैत्र २५ ।
प्रधानमन्त्री केपी शर्मा ओलीले आज राष्ट्रका नाममा सम्बोधन गर्दै कोरोना भाइरसको सङ्क्रमण रोकथाम र उपचारमा युद्धस्तरमा काम भइरहेको जनाउनुभएको छ ।
प्रधानमन्त्री ओली सरकार, राजनीतिक दल र सबैको संयुक्त कमाण्डका रुपमा सङ्घीय सरकारले सञ्चालन गरेको कोरोना रोकथाम र नियन्त्रण व्यवस्थापन केन्द्र (सिसिएमसी) ले युद्धस्तर र समन्वयात्मकरुपमा काम गरिरहेको उल्लेख गर्नुभएको हो ।
उहाँले चर्काे गर्मीको पर्वाह नगरी स्वास्थ्यकर्मी र सुरक्षाकर्मीहरु निरन्तर खटिरहेकामा उच्च प्रशंसा गर्दै यसमा सबैको सचेततापूर्वक साथ र सहयोगको अपेक्षा व्यक्त गर्नुभयो ।
ओलीले नेपालमा कोरोनाभाइरस संक्रमण दोस्रो चरणमा प्रवेश गरेलगत्तै थप सजगता र सावधानी हुनुपर्ने आवश्यकता रहेकोमा पनि जाेड दिनुभयाे । सिंगो मानवजाती कोरोनाविरुद्ध लडिरहेकोका बेला नेपाल पनि यो रोगविरुद्ध लडिरहे बताउदैँ उहाँले खतरा अझै रहेकाले सजगता आवश्यक रहेको बताउनुभयाे ।
प्रधानमन्त्री ओलीले नेपालमा संक्रमितको संख्या नौ जनामा सिमिति भए पनि उच्च जोखिम कायमै रहेकाले आजबाट पुन आठ दिन लकडाउन गरेको त्यसको विकल्प नभएको बताउनुभयाे ।
काेराेनाकाे खोप र औषधि पत्ता नलागको अवस्थामा यसबाट बच्न लकडाउन नै एकमात्र विकल्प भएकाे भन्दै उहाँले सावधानी नअपनाए भयावह हुने भएकाले आजबाट थप ८ दिन लम्व्याउन सरका बाध्य भएको बताउनु भयाे ।
उहाँले भन्नुभयाे, ‘बाँकी समयका लागि पनि धैर्य गर्न आग्रह गर्दछु, आउने दुई साता थप चुनौतिपूर्ण हुन छ, महामारीका विरुद्ध थप सक्दो प्रयास सरकारले गर्नेछ।’