काठमाडौँ, २५ चैत । सर्वोच्च अदालतमा सीमा नाका बन्द गर्ने सरकारको निर्णयविरुद्ध परेको रिट निवेदनमाथि आज सुनुवाइ हुँदैछ ।
न्यायाधीशद्वय दीपककुमार कार्की र डा मनोजकुमार शर्माको संयुक्त इजलासमा सोमवार शुरु भएको बहस नसकिएपछि आज मङ्गलबार सुनुवाइ हुने भएको हो । न्यायाधीश डम्बरबहादुर शाहीको एकल इजलासले यही चैत १२ गते सरकारको निर्णयविरुद्ध अन्तरिम आदेश जारी गर्न अस्वीकार गरेको थियो । छलफलका लागि दुवै पक्षलाई चैत २४ गते बोलाइएको थियो ।
कोरोना रोकथाम तथा नियन्त्रणका लागि सरकारद्वारा गठित उच्चस्तरीय समितिसहित आठवटा सरकारी निकाय तथा समितिलाई विपक्षी बनाई अधिवक्ताद्वय माधव बस्नेत र मीरा खड्का बस्नेतले यही चैत १० गते सर्वोच्च अदालतमा रिट निवदेन दायर गर्नुभएको थियो ।
रिट निवेदनमा नेपाली नागरिकलाई विदेशमा असुरक्षित रूपमा राख्नुपर्ने आवश्यकता नरहेकाले नेपाल आउन चाहने प्रत्येक नेपालीलाई प्रवेश निषेध नगरी सहज आउन दिनुपर्ने र आफै आउन नसक्नेलाई सरकारले उद्धार गरी ल्याउनसमेत रिट निवेदनमा माग गरिएको थियो ।