काठमाडौँ २५ चैत्र ।
सत्तारुढ नेपाल कम्युनिस्ट पार्टी (नेकपा)ले आज सचिवालय बैठक बोलाएको छ । आज अपरान्ह ४ बजे बैठक बोलाइएको नेकपा प्रवक्ता नारायणकाजी श्रेष्ठले जानकारी दिनुभएको छ ।अध्यक्षद्वय केपी ओली र पुष्पकमल दाहाल ‘प्रचण्ड’ले आपसी परामर्शपछि प्रधानमन्त्रीको सरकारी निवास बालुवाटारमा मंगलबार बैठक बोलाएका हुन् ।
बैठकमा कोरोना भाइरस (कोभिड(१९) को रोकथाम तथा उपचारमा सरकारले गरिरहेका काम, राहत तथा स्वास्थ्य सामाग्री खरिदमा देखिएको विवाद लगायतका विषयमा छलफल हुनसक्ने नेताहरुले बताएका छन् । स्वास्थ्य सामाग्री खरिदको जिम्मा नेपाली सेनालाई दिएको नेकपाभित्र असन्तुष्टि छ ।
पछिल्लो समय नेकपामा नेताहरुले सचिवालयको बैठक बोलाउन माग गर्दै आएका थिए । यसबारे प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीच कुराकानी पनि भएको थियो । तर, बैठक बोलाइएको थिएन ।
कोरोनाको महामारी लगायतका विषयमा सरकारले गरिरहेका कामबारे जानकारी लिने बैठकको एजेण्डा रहेको महासचिव विष्णु पौडेलले बताउनु भयो ।