चैत्र १६, बुटवल ।
बुटवलमा रहेको कोरोना अस्थायी अस्पतालको आइसोलेसनमा उपचाररत एक जनाको मृत्यु भएको छ । आइतबार दिउँसो १ बजे उपचारकै क्रममा ३४ बर्षिय ती युवाको मृत्यु भएको प्रदेश ५ का सामाजिक विकास मन्त्री सुदर्शन बरालले जानकारी दिए ।
तर कोरोना वा अन्य कारणले भन्ने पुष्टि नभएको उनले बताएका छन्। अस्पतालका मेडिकल सुपरिटेन्डेन्ट डा. राजेन्द्र खनालका अनुसार उनमा ज्वरो र खोकीको लक्षण देखिएपछि चैत १३ गते लुम्बिनी प्रादेशिक अस्पतालले सञ्चालन गरेको कोरोना विशेष अस्पताल बुटवल धागो कारखानामा राखिएको थियो। उनका अनुसार ती व्यक्ति दुबईबाट चैत १० गते नेपाल आएका थिए।
उनको नमुना परीक्षणका लागि आज मात्रै काठमाडौं पठाइएको छ। डा. खनालका अनुसार बिरामीको अवस्था नाजुक हुँदै गएपछि अस्पतालले हिजोदेखि काठमाडौं लैजाने तयारी गरेपनि सुरक्षा अभावमा लैजान सकेको थिएन।
स्वास फेर्न गाह्रो भएपछि परिवारले १३ गते अस्पताल ल्याएको डा. खनालले बताए। अस्पतालमा १० गते आएको बताए पनि छिमेकीले भने चैत ६ गते नै दुबईबाट आएको दाबी गरेका छन्।