संघीय समाजवादी पार्टी नेपालका सांसद प्रदीप यादवले संसद बैठक अविलम्ब रोक्नुपर्ने बताएका छन् ।
सरकारले कोराना भाइरसको त्रासका कारण भीडभाडमा नजान, भोजभतेर नगर्न निर्देशन दिइसके पनि संसद भवनमा कोरोना भइरसको सङ्क्रमण फैलन नदिनका लागि आवश्यक पूर्वतयारी नभएकोप्रति असन्तुष्टि व्यक्त गरे । शुक्रबार प्रतिनिधि सभा बैठकमा बोल्दै यादवले यस्तो बताएका हुन् ।
‘कोरोना भाइरसको त्रास विश्वभरि फैलाइरकेको छ । विदेशका डाक्टर र एक्सपर्टले पनि यसको रोकथाम छैन सावधानी नै उपचार हो भनिसकेका छन्,’ संघीय संसद भवनमै कोरोना रोकथामको आवश्यक पूर्वतयारी नभएको भन्दै उनले भने, ‘नेपाल सरकारले पनि यसको रोकथामका लागि उपाय अपनाउन निर्देशन दिएको छ । तर संसदमा नै यसको रोकथामका केही उपाय अपनाइएको छैन ।’
स्वास्थ्य मन्त्रालयले पनि संसदमा छिर्दा चेकजाँच केही नगरेको उनले असन्तुष्टि व्यक्त गरे । ‘सरकारले भिडभाडमा नजानु भनिसकेकोे छ । भोजभतेर नगर्नू, साबून पानीले हात धुनू भनिसकेको छ तर हामी सांसदहरु यसमा कत्तिको सावधानी अपनाएका छौं रु,’ यादवले भने, ‘हामी २ सय ७५ जना सांसद एकै ठाउँमा जम्मा भइरहेका छौं ।’
उनले सांसद, मन्त्रीहरु धेरै भिडभाडमा जाने भएको हुँदा संसद, मन्त्रीलाई कोराना सङ्क्रमित भए त्यसको परिणाम नराम्रो आउने भन्दै यसमा सरकारको ध्यानाकर्षण गराए ।