फागुण २२ काठमाण्डौं । गत आईतबार राष्ट्रिय सभागृहमा सत्तारुढ नेकपाका अध्यक्ष प्रचण्डमाथि जुत्ता प्रहार गर्ने जुम्लाका रतन तिरुवा शहीद परिवार भएको प्रहरीले बताएको छ । यस अघि सोही दिन नेकपा जुम्लाका अध्यक्षको नाममा जारी विज्ञप्तिमा रतन शहीद परिवार नभएको विप्लव समुहमा लागेको भनेर लान्छित गरिएको थियो । साथै पूर्व माओवादी समुहका केही नेताहरुले उनी शहीद परिवार नभएको बताएका थिए ।
तर प्रहरीले बनाएको छानविन समिति र अनुसन्धानले उनी शहीद मोहन तिरुवाको छोरा भएको तथा विप्लव नेतृत्वको नेकपामा आवद्ध नरहेको देखिएको छ ।
महानगरीय अपराध महाशाखाका एसएसपी सहकुल थापाको संयोजकत्वमा गठित छानबिन समितिले जुत्ता प्रहार गर्ने तिरुवाका बुवा मोहन तिरुवा २०५६ सालमा सुरक्षाकर्मीबाट मारिएको पुष्टि भएको छ । फागुन १८ गते राष्ट्रिय सभा गृहमा आयोजित कार्यक्रममा भाषण गरिरहेका पूर्वप्रधानमन्त्री दाहाललाई तिरुवाले ताकेर जुत्ता प्रहार गरेका थिए ।
‘जुत्ता प्रहार कुनै योजनाबद्ध रुपमा हानिएको पाइएन, आबेगमा आएर घटना घटाएको पाइयो,’ एसएसपी थापाले भने, ‘उनका बुवा मोहन तिरुवाको २०५६ सालमा सुरक्षाकर्मीको कारबाहीमा मारिएको पनि पाइयो ।’ प्रतिवेदनमा उल्लेख छ ।
जुत्ता प्रहारको घटनापछि महानगरीय प्रहरी आयुक्त डीआईजी विश्वराज पोखरेलले थापाको संयोजकत्वमा काठमाडौं परिसरका डीएसपी होविन्द्र बोगटी र महानगरीय प्रहरी वृत्त सिंहदरबारका इन्स्पेक्टर युवराज तिमल्सिना सम्मिलित आन्तरिक छानबिन समिति गठन गरेका थिए । समितिले बुधबार पोखरेललाई प्रतिवेदन बुझाएको छ । ५ पेजको प्रतिवेदनमा घटना पूर्व निर्धारित नभएको उल्लेख छ ।
तर घटना भएकै दिन सत्तारुढ नेकपा जुम्लाले रतन तिरुवा प्रहरीको खोजीसूचीमा रहेका व्यक्ति भएको र उनी नेत्रविक्रम चन्द समूहमा रहेको दाबी गरेको थियो ।
तिरुवा आफ्ना २ दाजुका साथ डल्लुमा भाडामा बस्दै आएका छन् । उनी अमिनतर्फ लोकसेवाको तयारीमा रहेको पनि खुलेको छ । जुत्ता प्रहार लगत्तै तिरुवालाई पक्राउ गरी प्रहरीले मुलुकी अपराध संहिता ऐन २०७४ अनुसार अभद्र व्यवहारको कसुरमा हिरासतमा राखेर अनुसन्धान गरिरहेको छ ।
साथै तिरुवा विप्लव नेतृत्वको नेकपासगँ आवद्ध नरहेको पनि प्रहरी प्रतिवेदनमा उल्लेख गरिएको छ ।
उनीमाथि कसुर पुष्टि भए १ वर्षसम्म कैद वा १० हजार जरिवाना वा दुवै सजाय हुनसक्ने कानुनी प्रावधान छ । छिट्टै तिरुवा विरद्धको कसुरमा प्रशासनमा मुद्दा दायर गर्ने प्रहरीले तयारी गरेको छ ।
