काठमाडौं, फागुन १६ ।
नेपाली कांग्रेसका प्रवक्ता विश्वप्रकाश शर्माले प्रधानमन्त्री केपी ओली पूर्व सञ्चारमन्त्री गोकुल बाँस्कोटाको प्रवक्ता बनेको आरोप लगाउनु भएको छ ।
प्रवक्ता शर्माले आज ट्वीट गर्दै प्रधानमन्त्री ओलीलाई सरकारका पूर्वप्रवक्ता बाँस्कोटाकै प्रवक्ता नबन्न सुझाव पनि दिनुभएको छ । बाँस्कोटाको ‘७० करोड कमिशन’ काण्डको बचाउ गरेर प्रधानमन्त्री ओलीले आफ्नो हैसियत बिर्सिएको आरोप पनि उहाको छ ।
कुनै पनि घटनाको प्रहरीले अनुसन्धान गर्ने, वकीलले बहस गर्ने र न्यायाधीशले फैसला गर्ने स्मरण प्रधानमन्त्री ओलीलाई गराउँदै शर्माले तीन वटै निकायले गर्ने कामको भारी बोक्दा प्रधानमन्त्रीको भारी बोक्न झन् गाह्रो हुने बताउनु भएको छ ।
हिजो काठमाडौैंमा गरिएको एक कार्यक्रममा प्रधानमन्त्री ओलीले बाँस्कोटा प्रकरणको प्रष्टीकरण दिनेक्रममा ‘अनाडी’ मान्छेले अनधिकृत तरिकाले टेप गरेर सुनियोजित रूपमा सरकारविरुद्ध षड्यन्त्र गरेको आरोप लगाउनु भएको थियो ।