नेपाल कम्युनिष्ट पार्टी (नेकपा) मोरङले पार्टी कार्यालय पाञ्चालीमा २५ औं जनयुद्ध दिवसको अवसरमा शहीदप्रति सम्मान अर्पण गरेको छ ।
जिल्ला पार्टीको आयोजनामा केन्द्रीय सदस्य गुरु बराल, इन्द्रबहादुर आङ्बो, जीवन घिमिरे, महेश रेग्मी, गोपी अछामी, धिरेन्द्र शर्मासहितको उपस्थितिमा कार्यक्रम आयोजना गरिएको हो ।
कार्यालयमा श्रद्धाञ्जलीसभासहित नेता तथा कार्यकर्ताले शहीदप्रति सम्मान अर्पण गरेका हुन् । कार्यक्रममा मोरङका सचिव गणेश उप्रेतीले इतिहासलाई बिर्सेर वर्तमानलाई न्याय हुन नसक्ने बताउँदै शहीदहरुको सम्झना आवश्यक रहेको बताउनु भएको छ ।
जनयुद्धमा बलिदानी दिनेको योगदानले गणतन्त्रसँगै समृद्धिको यात्रामा प्रवेश गर्ने अवसर प्राप्त भएको नेताहरुले त्यस अवसरमा बताएका छन् । तत्कालिन माओवादी पार्टी कार्यालयबाट तत्कालिन एमाले पार्टी कार्यालयमा सरेको जनयुद्ध दिवसको कार्यक्रम भव्य रुपमा सम्पन्न भएको छ ।
यसैबीच जनयुद्ध र जनआन्दोलनका शहीदहरुको स्मृतिमा नेकपाका भ्रातृ संगठनहरुले दिनभर बिभिन्न कार्यक्रम आयोजना गर्ने भएका छन् । बुधबार विराटनगरमा कोशी साँस्कृति संघले भव्य कार्यक्रमको आयोजना गरेको थियो ।
काठमाण्डौंमा जनक्रान्तिका घाइते अपांग योद्धा संघले बिहीबार महाराजगञ्जस्थित रोयल पार्टी प्यालेसमा, जनसाँस्कृतिक महासंघले समेत १ बजे पार्टी कार्यालय पेरिसडाँडामा र वेपत्ता योद्धा फाउन्डेशनले दिउँसो २ बजे जनपथ मावि कलंकीमा कार्यक्रम समेत गर्ने भएका छन् । नेकपा सम्बद्ध अनेरास्ववियूले पाँच बजे माइतीघर मण्डलामा दीप प्रज्ज्वलन गर्ने कार्यक्रम समेत राखिएको छ ।