६ माघ, काठमाडौं । राष्ट्रियसभा सदस्यको रिक्त पदको निर्वाचनका लागि आज राति १२ बजेदेखि मौन अवधि शुरु हुँदैछ ।
आचारसंहिता बमोजिम निर्वाचन हुनु ४८ घण्टा अगाडी देखि मौन अवधि सुरु हुन्छ । राष्ट्रियसभाको निर्वाचन माघ ९ गते बिहीबार हुँदैछ ।
मौन अवधि सुरु भएपछि दलहरु वा उम्मेदवारले मतदातासँग मत माग्न वा कुनै पनि माध्यमद्धारा चुनावी प्रचारप्रसार सन्चालन गर्न पाउनेछैनन् ।
आयोगले निर्वाचनलाई स्वच्छ, स्वतन्त्र, निष्पक्ष एवं विश्वसनीय रूपमा सम्पन्न गर्न गराउन मौन अवधि र निर्वाचन आचारसंहिताको पूर्ण पालना गर्न गराउन नेपाल सरकार, प्रदेश सरकार, स्थानीय तहलगायत सरोकारवालाको ध्यानाकर्षण गराइएको छ ।
मुलुकका सातवटा प्रदेशका उच्च अदालत रहेका जिल्ला मोरङ, धनुषा, ललितपुर, कास्की, दाङ, सुर्खेत र डोटीमा निर्वाचन केन्द्र कायम गरिएको छ । मौन अवधिमा कुनै पनि सञ्चार माध्यमबाट निर्वाचन प्रचारप्रसार कार्य गर्न गराउन पाइने छैन ।
आयोगका सहसचिव राजकुमार श्रेष्ठद्वारा जारी विज्ञप्तिमा मौन अवधिमा आफ्ना वेबसाइट, ट्वीटर, फेसबुक, भाइबर वा एसएमएस जस्ता सामाजिक सञ्जाल वा विद्युतीय माध्यमको प्रयोग गरी मत माग्न र निर्वाचन प्रचारप्रसार नगर्न भनिएको छ ।
निर्वाचनलाई स्वच्छ, स्वतन्त्र र निष्पक्षरूपमा सम्पन्न गर्ने गराउने कार्यमा सहयोग पु¥याउन सबै मतदाता, उम्मेदवार, राजनीतिकर्मी, निर्वाचनमा संलग्न कर्मचारी, समाजसेवी, पत्रकार, विभिन्न पेशा तथा व्यवसायमा संलग्न व्यक्तिलगायत आम नागरिकलाई आयोगले आग्रह गरेको छ ।