५ माघ, काठमाडौं ।
सत्तारुढ नेपाल कम्युनिस्ट पार्टीका अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीच आज भेटवार्ता भएको छ ।
बालुवाटारमा आज बिहान भएको भेटमा ओली र प्रचण्डबीच सभामुख उम्मेदवारको टुंगो लगाउन करिब ३ घन्टा छलफल भएको थियो । यसलगत्तै अपरान्ह ४ बजे नेकपाको सचिवालय बैठक बोलाइएको छ ।
नेकपा स्थायीसमिति सदस्य देवेन्द्र पौडेललाई भेटेर प्रचण्ड प्रधानमन्त्री ओलीसँग परामर्श गर्न आज बिहानै प्रधानमन्त्री निवास बालुवाटार पुग्नुभएको थियो ।
बिहान निवास खुमलटारमा नेता देवेन्द्र पौडेललाई भेट गरी प्रचण्डले पौने ९ बजे बालुवाटार पुगेका थिए । भोलीका लागि प्रतिनिधि सभाको बैठक तोकिएकाले सभामुखका उम्मेदवार आजसम्म टुंग्याइ सक्नुपर्ने दवाव नेकपालाई छ ।
नेकपाले सभामुख उम्मेदवार चयन गर्न नसकेका कारण प्रतिनिधिसभा बैठक बस्न सकेको छैन। पटक–पटक सूचना टाँसेर बैठक स्थगित हुँदै आएको छ।
भोली ६ गते संसद बैठक आह्वान गरिएको छ । बैठक बस्नु अघि नै सभामुखको बिषय टुङग्याउने कसरतमा सत्तारुढ दल लागेको छ ।