बुटवल, पुस १८ ।
प्रतिपक्षी दल नेपाली कांग्रेसकी नेतृ सुजाता कोइरालाले सभापति शेरबहादुर देउवाले पार्टी समाप्त पार्न लागेको आरोप लगाउनु भएको छ ।
प्रेस युनियनले आज रुपन्देहीको बुटवलमा आयोजना गरेको पत्रकार सम्मेलनमा बोल्दै सुजाताले फेरि पार्टी सभापति बन्ने लोभमा देउवाले पार्टी समाप्त गर्न खोजेको बताउनु भएको हो ।
उहाँले आन्तरिक विवाद नमिले आउने चुनावमा कांग्रेस जिरो हुने भविष्यवाणी गर्नु भएको हो । कांग्रेसलाई भोट हाल्दा अन्य कार्यकर्ताको पनि हात काँप्ने स्थिति नआओस् भन्नेतर्फ ध्यान दिनु पर्ने उहाँले बताउनुभयो ।
पार्टीको विवाद तत्काल अन्त्य गर्नुपर्ने र कांग्रेस बलियो बनाउनुपर्ने कोइरालाको धारणा छ । कांग्रेस महाधिवेशनमा सबैको साझा उम्मेदवार बन्नुपर्ने र पार्टीलाई बलियो बनाउनेलाई जिताउनुपर्ने उहाँको भनाइ छ ।
कांग्रेस केन्द्रीय सदस्यसमेत रहेकी कोइरालाले कांग्रेस बलियो भएमात्रै लोकतन्त्र बलियो हुने बताउनुभयो । शशांक र शेखर कोइरालासँग आफ्नो कुनै विवाद नभएको दाबी गर्दै उहाँले कोइराला परिवार भनेर मात्रै नभएर पार्टीमा योगदान गरेको इतिहास पनि रहेका बताउनुभयो । साथै उहाँले जो भए पनि मिलेरै अगाडि बढ्ने बताउनुभयो।