३ पुस, काठमाडौं । राजश्व अनुसन्धान विभागले पेप्सी उत्पादक कम्पनी वरुण वेभरेजविरुद्ध भ्याट छलीको अभियोगमा मुद्दा दायर गरेको छ ।
झुट्टा तथा नक्कली मूल्य अभिवृद्धि कर प्रयोग गरी राज्यलाई १ अर्ब २९ करोड ९२ लाख रुपैयाँ हानि नोक्सानी गराएको भन्दै विभागले बिहीबार वेभरेजका अमित गुप्तासहित ७ जना उपर करिब २ अर्ब रुपैयाँ जरिबाना र ३ वर्ष कैद सजायको माग गर्दै जिल्ला अदालत काठमाडौंमा मुद्दा दायर गरेको हो ।
विभागका महानिर्देशक दीर्घराज मैनालीका अनुसार वरुण वेभरेज प्रालिले राजश्व चुहावट गर्ने दूरासयले झुट्टा तथा नक्कली कर विजक जारी गरेको पुष्टि भएपछि मुद्दा दायर गरिएको हो ।
वेभरेजका वर्तमान तथा पूर्व सञ्चालकहरु अमित गुप्ता, रविकान्त जयपुरिया, रोहित कोहली, प्रविणकुमार अग्रवाल, विनादेकुमार सिंह र अशोक कुमारबाट बिगोको दोब्बरसम्म जरिवाना र ३ वर्ष कैद सजाय माग गर्दै मुद्दा दायर भएको उहाँले बताउनु भयो ।
