काठमाडौं । नेपाली कांग्रेसकी केन्द्रीय सदस्य तथा गिरिजाप्रसाद कोइराला फाउन्डेसनकी अध्यक्ष सुजाता कोइरालाले नेपाली संस्कार र संस्कृति नै प्रजातान्त्रिक भएकाले मुलुक कम्युनिस्ट सिद्धान्तमा चल्छ भनेर आत्तिरहनु नपर्ने बताएकी छिन् ।
गिरिजाप्रसाद कोइराला फाउन्डेसन, सिन्धुपाल्चोकले बिहीबार काठमाडौंमा गरेको कार्यक्रममा उनले नेपाल कम्युनिस्ट मुलुक बन्न नसक्ने जिकिर गरिन् ।
विश्वभर प्रजातन्त्र कमजोर बनिरहेका बेला नेपालमा प्रजातान्त्रिक व्यवस्था बलियो बनाउन नेपाली कांग्रेसले भूमिका निर्वाह गर्नुपर्ने नेत्री कोइरालाको सुझाव थियो ।
‘नेपाली जनता प्रजातन्त्रसँग रमाउन चाहन्छन् । त्यसैले सहमति, सहकार्य र एकताका आधारमा कांग्रेसले सबै विचार र सिद्धात बोकेका दल र व्यक्तिहरुलाई साथ लिएर हिँड्नुपर्ने बेला आएको छ,’ उनले भनिन्, ‘प्रजातान्त्रिक विधि र पद्दति बुझेका जनतालाई जबर्जस्त कम्युनिस्ट भनिरहनु जरुरी छैन ।’
कार्यक्रममा प्राध्यापक तथा विश्लेषक डा. जयराज आचार्यले गिरिजाप्रसाद कोइरालाको जस्तो विचार र सांगठनिक भूमिका आजको कांग्रेसलाई आवश्यक रहेको बताए ।