पोखरा, मंसिर ११ ।
प्रमुख प्रतिपक्षी दल नेपाली कांग्रेसका वरिष्ठ नेता रामचन्द्र पौडेलले कालापानीमा सांसदहरुको टोली लिएर जाने पहिलो नेता आफु रहेको दाबी गर्नु भएको छ ।
आज पोखरामा आफ्ना उमेद्वारलाई भोट माग्ने क्रममा पौडेलले सञ्चारकर्मीहरुसँग कुराकानी गर्दैे कम्युनिष्टका सांसदहरु र तथ्यांक विभागका महानिर्देशक सहितको टोली लिएर कालापानी गएको बताउनु भएको हो ।
नेकपाका नेताहरुले कालापानीको विषयमा कांग्रेसलाई दोष लगाएकोप्रति उहाँले आपत्ति जनाउनु भयो। कम्युनिष्टहरुको झुटो प्रचारले भारतले सीमा नाघेको उहाँको आरोप थियो । अहिले कम्युनिष्टहरुले जनतालाई गुम्राहमा पार्ने दुष्प्रयास गरेको उहाँले आरोप लगाउनुभयो ।
उपनिर्वाचनको विषयमा नेकपाले सत्ता र शक्तिको आडमा चुनावलाई प्रभाव पार्ने काम गरेको पनि उहाँको आरोप थियो । पौडेलले कास्कीमा कांग्रेसले सही उमेद्वार चयन गरेको दाबी पनि गर्नुभयो ।
त्यसअघि नेपाल प्रेस युनियन कास्कीद्वारा आज आयोजित पत्रकार भेटघाटमा नेता पौडेलले आसन्न उपनिर्वाचनको पवित्रता उल्लङ्घन गर्न नहुने बताउनुभयो ।
उहाँले अहिलेको चुनाव जनताद्वारा वर्तमान सरकारको मध्यावधि मूल्याङ्कन गर्ने चुनाव भएका कारण यसको पवित्रता उल्लङ्घन गर्न नहुने बताउनुभयो ।