७ मंसिर, काठमाडौं ।
अकुपाई टुँडिखेल अभियानको तेस्रो कार्यक्रमअन्तर्गत आज साहित्यिक जमघट हुने भएको छ । आज विभिन्न साहित्यकारहरुले रचनात्मक ढंगले विरोध जनाउने अभियानका संयोजक विजय श्रेष्ठले जानकारी दिनुभयो ।
सांस्कृतिक, प्राकृतिक, सामाजिक प्रत्याभूति गराउने टुँडिखेल हाल पार्किङ, अनाधिकृत बसपार्क, पसलहरु सञ्चालन गरेर मासिदै गएको भन्दै सम्पदाप्रेमीहरुले गत कात्तिकदेखि अकुपाई टुँडिखेल अभियान चलाउँदै आएका छन् ।
यसअघि कात्तिक २३ गते पहिलो चरणको विरोध स्वरुप पूर्वप्रधानमन्त्रीदेखि काठमाडौं महानगरपालिकाका उपमेयरसँगै विभिन्न क्षेत्रमा आवद्ध सर्वसाधारणहरुको उपस्थितिमा मानव साङ्लो बनाएर टुँडिखेल संरक्षणको सन्देश दिइएको थियो ।
पछिल्लो हप्ता दोस्रो चरणको आन्दोलनको सूचिअनुसार टुँडिखेल भित्र बिरुवा रोपिएको थियो । कुनै समयमा एसियाकै ठूलो खुला मैदान मानिने टुँडिखेल अहिले साँघुरिँदै गएको छ । केही वर्षदेखि नेपाली सेनालाई समेत टुँडिखेल मिचेको आरोप लागेको छ ।