काठमाडौं, मंसिर २ ।
आज मन्त्रीमण्डलमा केही हेरफर गर्ने प्रधानमन्त्री केपी शर्मा ओलीले तयारी गर्नु भएको छ । प्रधानमन्त्री ओलीले आज साँझ सम्म केहि नयाँ मन्त्रीलाई जिम्मेवारी दिने तयारी गर्नु भएको हो ।
उहाँले वर्तमान सरकारमा रहेका मन्त्रीहरुको कार्यसम्पादनका आधारमा आधा दर्जन बढि मन्त्री फेर्ने योजना बनाउनु भएको प्रधानमन्त्री निकट स्रोतले जनाएको छ । पार्टीको उच्च तहमा छलफल गरी नाममा सहमति भए, आजै नभए भोलिसम्ममा नयाँ मन्त्री नियुक्त गर्ने बताइएको छ ।
सरकारको कामकारबाहिलाई लिएर असन्तुष्टि बढिरहेका बेला मन्त्रीहरुको कार्यप्रगतिप्रति रोष प्रकट गर्दै उहाँले विकल्प खोज्न लाग्नु भएको हो । उहाँले आजै यसबारे पार्टीका अर्का अध्यक्ष पुष्पकमल दाहालसँग छलफल गर्दै हुनुुहुन्छ ।
प्रधानमन्त्री ओलीले दाहालसँगको छलफलपछि फालिने र मन्त्रिपरिषदमा ल्याइने नयाँ मन्त्रीका विषयमा अन्तिम निर्णय लिनु हुनेछ ।
प्रधानमन्त्री ओलीले मन्त्रीमण्डल पूर्नगठन गर्ने तयारी गरेपछि खुमलटार र बालुवाटारमा नेताहरुको चहलपहल बढेको छ । नेकपाका अर्का अध्यक्ष प्रचण्ड निवास खुमलटारमा सरकारमा रहेका फालिने सम्भावित मन्त्रीदेखि नयाँ नियुक्त हुने मन्त्रीहरु सम्मका विषयमा नेताहरुबीच छलफल भएको स्रोत बताउछ ।
छलफलका लागि सोमबार बिहान नेकपाका बरिष्ठ नेता माधवकुमार नेपाल, प्रवक्ता नारायणकाजी श्रेष्ठ, उर्जामन्त्री वर्षमान पुन र भौतिक पूर्वाधार तथा यातायात मन्त्री रघुविर महासेठलगायतका नेताहरुको जमघट रहेको स्रोतले जानकारी दियो।
प्रधानमन्त्री ओलीले दाहालसँगको छलफलपछि फालिने र मन्त्रिपरिषदमा ल्याइने नयाँ मन्त्रीका विषयमा अन्तिम निर्णय लिने तयारी गरेपछि खुमलटारमा नेताहरु पुगेको बताईएको छ ।
नेकपाको सचिवालय बैठकले आइतबार प्रधानमन्त्री ओलीलाई मन्त्रिपरिषद् पूर्नगठनका लागि सैद्धान्तिक सहमति दिएको थियो। त्यसपछि नेताहरुबीच भेटघाट र संवाद बाक्लिएको हो।
स्रोतका अनुसार उता बालुवाटारमा पनि प्रधानमन्त्री ओलीले क्याबिनेट पुर्नगठनकै एजेण्डामा केन्द्रीत रहेर आफू निकटस्थ नेताहरुसँग छलफल गरिरहेका छन्।