काठमाडौ, कार्तिक १५ ।
मंसिर १४ मा हुने उपनिर्वाचनका लागि उम्मेदवार तय गर्न सत्तारुढ नेकपाको सचिवालय बैठक भोली (शनिबार) विहान बोलाईएको छ ।
प्रधानमन्त्री निवास बालुवाटारमा बस्ने बैठकमा प्रतिनिधिसभा, प्रदेशसभा र उपमहानगरपालिकाका उम्मेदवारबारे छलफल हुने महासचिव बिष्णु पौडेलले जानकारी दिनुभयो ।
आज बिहान दुवै अध्यक्ष केपी शर्मा ओली र प्रचण्डबीच प्रधानमन्त्री निवासमा भएको छलफलपछि सचिवालय बैठक बोलाइएको हो । छलफलमा प्रधानमन्त्रीले आफ्नो स्वास्थ्य अवस्थाबारे प्रचण्डलाई जानकारी गराएका थिए । नेकपा स्रोतका अनुसार प्रधानमन्त्रीले आफूलाई अतिरिक्त कुनै समस्या नरहेको बताएका थिए ।
लामो समयदेखि नेकपा सचिवालय बैठक बस्न सकेको छैन । सचिवालय नबसेका कारण पार्टी एकीकरणका बाँकी कामसमेत थाति रहेका छन् ।
तर शनिबारको बैठकमा भने उम्मेदवार छनौटमै छलफल हुने स्रोतले जनाएको छ ।
नेकपाले प्रतिनिधिसभा, प्रदेशसभा र उपमहानगरपालिकाका मेयर उम्मेदवार केन्द्रबाट तय गर्ने तथा गाउँपालिका अध्यक्ष उपाध्यक्ष प्रदेश कमिटीले तय गर्ने मापदण्ड बनाएको छ । त्यस्तै वडाध्यक्षका उम्मेदवारका हकमा सम्बन्धित जिल्ला कमिटीले निर्णय गर्नेछन् ।
रवीन्द्र अधिकारीको निधनपछि रिक्त रहेको कास्की(२ को प्रतिनिधिसभा सदस्यमा विद्या भट्टराई,सोमना प्यासी र राजकाजी गुरुङको नाम सिफारिस भएको छ । सो क्षेत्रमा नेकपाले उनकी पत्नी विद्यालाई उम्मेदवार बनाउने लगभग निश्चित रहेको नेकपा स्रोत बताउछ।