काठमाडौं, ५ कात्तिक ।
राष्ट्रपति विद्यादेवी भण्डारी म्यान्मा र जापान भ्रमण सकेर बुधबार स्वदेश फर्कदैछिन् । जापानी सम्राट् नोरुहितोको गद्दी आरोहण विशेष समारोहमा सहभागी हुन आइतबार म्यान्माबाट जापान पुगेकी राष्ट्रपति भण्डारी हानेदा विमानस्थलबाट चीनको ग्वान्जाओ हुँदै स्वदेश फर्कन लागेकि हुन् । आइपुग्नुभएको हो ।
राष्ट्रपति भण्डारीसँग गृहमन्त्री रामबहादुर थापा, परराष्ट्र सचिव शङ्करदास वैरागी, जापानका लागि नेपालका राजदूत प्रतिभा राणा, राष्ट्रपति कार्यालयका सचिव डा हरि पौडेल, राष्ट्रपतिका प्रमुख स्वकीय सचिव डा भेषराज अधिकारी तथा परराष्ट्र मन्त्रालय र राष्ट्रपति कार्यालयका उच्चपदस्थ अधिकारी तथा सञ्चारकर्मी सहभागि छन् ।
जापानको तीनदिने औपचारिक भ्रमणमा रहँदा राष्ट्रपति भण्डारीको जापानी प्रधानमन्त्री सिन्जो आबे र भारतीय राष्ट्रपति रामनाथ कोविन्दसँग छुट्टाछुट्टै भेटवार्ता भएको थियो । नेपाली प्रतिनिधिमण्डलले टोकियोको करीब एक हजार २०० पुरानो आसाकुसा मन्दिर र स्काइ ट्री टावरको पनि भ्रमण गरेको थियो ।
राष्ट्रपति भण्डारीको स्वागतमा जापानस्थित नेपाली राजदूतावासले रात्रिभोजको आयोजना गरेको थियो । यसअघि राष्ट्रपति भण्डारीले म्यान्माका राष्ट्रपति विन मिन्तको मैत्रीपूर्ण निमन्त्रणामा म्यान्माको पाँचदिने राजकीय भ्रमण गरिन् । म्यान्मा भ्रमणमा परराष्ट्रमन्त्री प्रदीपकुमार ज्ञवाली पनि सहभागि थिए ।