४ असोज, अबुधाबी । युएईमा अवस्थित विश्वकै अग्लो भवन बुर्ज खलिफामा नेपाली राष्ट्रिय झण्डा फहराएको छ । संविधान दिवसको अवसर पारेर शुक्रबार साँझ स्थानीय समयअनुसार ९ः१० मा बुर्ज खलिफामा नेपाली झण्डा फहराइएको हो ।
विभिन्न देशको राष्ट्रिय दिवस तथा स्वतन्त्रता दिवसको दिन संसारको अग्लो भवन बुर्ज खलिफामा सम्बन्धित देशको झण्डा फहराउने चलन भएपनि नेपालको राष्ट्रिय झण्डा फहराएको पहिलो पटक हो ।
बुर्ज खलिफामा नेपालको झन्डाको प्रतिविम्ब देखिँदा सयौंको संख्यामा उपस्थित नेपालीहरुले ‘नेपाल’ भन्दै ताली बजाएर खुसियाली मनाएका थिए । शुक्रबार त्यहाँ सार्वजनिक विदा थियो ।
नेपालीको समेत श्रमले बनेको उक्त भवनमा नेपालको झण्डा फहरिनु गौरवको कुरा भएको भन्दै नेपाली दूतावास र यहाँको सरकारप्रति आभार प्रकट गरेका छन् ।
यस्तै युएईको राजधानी अबुधावीमा रहेको एडनक हेडक्वाटर भवनमा पनि नेपालको झन्डा प्रदर्शन गरिएको छ । राजदूत कृष्णप्रसाद ढकालले त्यहाँको सरकारसँग बुर्ज खलिफामा नेपालको झण्डा फहराउन आग्रह गरेका थिए
उनले आफ्नो प्रयास सफल भएको भन्दै खुशि ब्यक्त गरे । संसारकै सबैभन्दा अग्लो भवनमा इतिहासमै पहिलोपल्ट नेपालको राष्ट्रिय झन्डा झलमलाउँदा गर्वले छाती चौडा र शिर ठाडो भएको उनको भनाई छ ।
