१५ साउन, काठमाडौं । राजश्व अनुसन्धान विभागले काठमाडौं टावरका ठेकेदार मनोज भेटुवालसहित ४ जनाविरुद्ध हुण्डि गरी विदेशी विनिमय अपचलनको मुद्धा दायर गरेको छ ।
विभागले बुधवार विज्ञप्ति जारी गरी भेटुवालसहित निशा गुरुङ, राजकुमार बिष्ट र शिव बिष्ट विरुद्ध ४ करोड ६० लाख ४२ हजार ८५० रुपैयाँ बराबरको बिगो दावी गर्दै काठमाडौं जिल्ला अदालतमा मुद्दा दायर गरेको जनाएको छ ।
उनीहरुविरुद्ध ३ वर्ष कैद र बरामद दशी समेत जफा गर्नुपर्ने रिटमा माग गरिएको छ । भेटुवाल खुलामञ्चमा अवैधानिक रुपमा सटर बनाएर विक्री गर्ने ठेकेदार हुन् ।
उनको कम्पनी जलेश्वर स्वच्छन्द बिकोइको शंकास्पद कारोबारलाई आधार मानेर विभागले गरेको अनुसन्धानमा ४ करोड ६० लाख भन्दा बढी रकम रकम हुण्डी गरी अवैध रुपमा नेपाल भित्र्याएको भेटिएको हो ।
यस्तो रकम नेपालमा भित्र्याउँदा राष्ट्र बैंकमार्फत प्रक्रिया पुरा गर्नुपर्ने भएपनि उक्त प्रक्रिया पुरा गरेका नपाईएको जनाईएको छ । विभागले यो रकम सिंगापुरमा विभिन्न व्यक्तिसँग लगानीका नाममा उठाएर टावरका लागि भित्र्याएको पुष्टी भएको बताएको छ ।
अभियुक्त राजकुमार बिष्ट निशा गुरुङको कर्मचारी भएको र उनीहरुको कम्पनीले आन्तरिक राजश्व कार्यालयमा शून्य कारोबारको हिसाव देखाएपनि विभिन्न समयमा कम्पनीमार्फत नै कारोबार गरेको भेटिएको विभागले जनाएको छ ।
पुरानो बसपार्कमा बन्ने भनिएको काठमाडौं टावर निर्माणका लागि भेटुवालले विभिन्न देशबाट रकम भित्र्याएको तथ्य यसअघि नै सार्वजनिक भएको थियो । तर,उनले हुण्डिमार्फत रकम भित्र्याएर टावरमा लगानी गरिरहेको पाइएको विभागले जनाएको छ ।
