ललितपुर, १ साउन ।
ललितपुर महानगरपालिका आर्थिक वर्ष २०७६÷७७ का लागि ५ अर्ब बढीको बजेट पारित गरेको छ ।
महानगरको मंगलबार बसेको चौथो नगरसभाले ५ अर्ब ३१ करोड ४३ लाख ५७ हजार बजेट पारित गरेको हो ।
बजेटमा पूर्वाधार, मूर्त तथा अमूर्त सम्पदा संरक्षण, हरियाली संरक्षण लगायतलाई प्राथमिकतामा राखिएको छ ।
पूर्वाधार निर्माण र हरियाली प्रवर्द्धन प्राथमिकतामा राखिएको महानगरपालिका प्रमुख चिरिबाबु महर्जनले बताउनुभयो ।
महानगरका हरेक वडालाई विकास सूचांकंका आधारमा ३ किसिमले वर्गिकरण गरि बजेट छुट्याएको छ ।
जसमध्ये पहिलो वर्गमा परेका वडा नम्बर १, ६ ७, ८, १०, ११ र १९ मा १ करोड ६५ लाख बजेट विनियोजन गरिएिको छ । दोस्रोमा परेका २, ३, ४, ५, ९, १३, १४, १५ र १७ नम्बर वडामा २ करोड रुपैयाँ र तेस्रो किसिममा परेका वडा नम्बर १२, १६, १८ , २० २१ , २२, २३, २४, २५, २६, २७, २८ र २९ लाई २ करोड ७५ लाख रुपैयाँ बजेट छुट्याइएको छ ।
महानगरका सबै वडाको विकास समान गतिमा नभएकाले वर्गिकरण गरी विकास खर्च बजेट छुट्याइएको महानगर प्रमुख महर्जनले बताउनुभयो ।
