काठमाडौं, जेठ २० ।
नेपाली कांग्रेसका नेता तथा पूर्वअर्थमन्त्री ज्ञानेन्द्रबहादुर कार्कीले आगामी आर्थिक वर्षको बजेट खुद्रे आयोजनामा अल्मलिएको बताउनु भएको छ । आज प्रतिनिधिसभा बैठकमा बजेटमाथि छलफलमा भाग लिँदै उहाँले सरकारले ठूला आयोजनामा ध्यान नदिएको बताउनुभयो ।
संघीयताको मर्म विपरीत प्रदेश तथा स्थानीय तहहरुले सम्पन्न गर्नुपर्ने काम पनि आफैले राखेर सरकार टुक्रे आयोजनामै अल्मलिएको उहाँले आरोप लगाउनुभयो । बजेटमार्फत सरकारले लिएको ८ प्रतिशतको आर्थिक वृद्धिदरको लक्ष्य पुरा नहुने पनि उहाँले दावी गर्नुभयो ।
सरकारले लिएको ५ लाखलाई रोजगारी दिने लक्ष्य पनि उडन्ते लक्ष्य भएको टिप्पणी गर्नुभयो । २९ प्रतिशत वैदेशिक रोजगारीमा जाने नेपालीको संख्या घट्नुको कारण मलेसियाको रोजगारी भएको बताउनुभयो । उहाँले वैदेशिक ऋण परिचालनको लक्ष्य पनि पूरा नहुने बताउनुभयो ।
व्यापारघाटा न्युनीकरण गर्ने उपाय बजेटमा आफूले पढ्न नपाएको गुनासो उहाँले गर्नूभयो । सरकारले आगामी आर्थिक वर्षका लागि सिञ्चाईं क्षेत्रका लागि २३ अर्ब रुपैयाँ बजेट छुट्याएको भन्दै त्यो पर्याप्त नभएको उहाँले बताउनुभयो । बजेटले जलविद्युत् क्षेत्रलाई प्राथमिकतामा नराखेको उहाँको आरोप थियो ।
