काठमाडौ, २७ फागुन ।
राजनीतिक विश्लेषक डा. सुरेन्द्र केसीले सरकार र स्वतन्त्र मधेस गठबन्धनका संयोजक चन्द्रकान्त राउत (सिके) बीच भएको ११ बुँदे सहमतीको ड्राफ्ट बिदेशबाट आएको दाबी गरेका छन् ।
राजधानीमा सोमबार सम्वाद चौतारीले आयोजना गरेको कार्यक्रममा बोल्दै डा. केसीले विदेशमा अंग्रेजीमा बनेको ड्राफ्ट नेपालीमा उल्था गर्दा भाषामा गडबडी भएको दाबी गर्दै भने, ’बाहिरबाट ड्राफ्ट आएकाले शब्दको उल्थामा फरक परेको हो, सहमति उनीहरुले गरेका भए प्रष्ट भाषामा आउँथ्यो । ’
विगतमा भएका महत्वपूर्ण सहमति पनि विदेशी भूमिमा भएकाले शंका गर्ने आधार धेरै भएको जिकिर गर्दै केसीले शब्दलाई जसले जसरी व्याख्या गरेपनि ‘जनअभिमत’ भन्नाले जनमतसंग्रह नै हुने ठोकुवा गरे ।
केसीले ११ बुँदे सहमति नेपाल र नेपालीको अहितमा भएकाले यसको वास्तविकताबारे सरकारले जनतालाई जवाफ दिनुपर्ने बताए ।