काठमाडौ । प्रधानमन्त्री केपी शर्मा ओलीले सुदूरपश्चिम प्रदेश सभामा विशेष सम्बोधन गर्ने भएका छन् । प्रधानमन्त्री ओलीले बुधबार बिहान सम्बोधन गर्ने कार्यक्रम रहेको छ ।
प्रदेश सभा बैठकमा प्रधानमन्त्रीको सम्बोधनका लागि भौतिक व्यवस्थापनदेखि संसद भवन सजावटलगायत आवश्यक तयारी पूरा भएको प्रदेश सभा सचिवालयका सचिव बालाराम शर्माले जानकारी दिए ।
उनका अनुसार संसद भवनमा प्रधानमन्त्रीका लागि सभामुखको विशेष स्थानमा व्यवस्था गरिएको छ ।
प्रधानमन्त्रीलाई सभामुख अर्जुनबहादुर थापा र मुख्यमन्त्री त्रिलोचन भट्टले स्वागत गर्ने कार्यक्रम छ । बैठक सुरु भएपछि सभामुखले विशेष सम्बोधनका लागि प्रधानमन्त्रीलाई आग्रह गर्ने छन्, भने उनको सम्बोधनपछि बैठक समापन हुनेछ ।
बैठकपछि प्रधानमन्त्रीले सांसदहरुसँग सामुहिक फोटो खिच्ने कार्यक्रम रहेको संसद सचिवालयले जनाएको छ । प्रधानमन्त्रीको सम्बोधन सुन्न आउने व्यक्तिहरुका लागि संसद कक्षको पछाडि बस्ने व्यवस्था गरिएको छ । प्रधानमन्त्री आउने भएपछि प्रदेश सभा परिसर सिंगारिएको छ ।
प्रदेश सभा कक्षमा सुरक्षा व्यवस्था कडा बनाएको छ । प्रदेश सभामा सम्बोधन गरेपछि प्रधानमन्त्री ओलीले धनगढीमा हुने नेपाल कम्युनिष्ट पार्टी (नेकपा)को कार्यकर्ता भेलालाई सम्बोधन गर्ने कार्यक्रम रहेको छ ।
