काठमाडौं, १५ मंसिर । एसिया प्रशान्त सम्मेलन आजबाट काठमाडौंमा सुरु हुँदैछ ।
युनिभर्सल पिस फेडेरेसनको आयोजनामा दुई दिनसम्म चल्ने सम्मेलनमा एसिया प्रशान्त क्षेत्रका उच्चस्तरीय राजनेता तथा प्रतिनिधिको सहभागिता रहने छ ।
सम्मेलनको मुख्य विषय ‘विश्वका गम्भीर चुनौतीहरुमाथि सम्बोधन: अन्तरनिर्भरता, पारस्परिक समृद्धि र सर्वव्यापक मूल्यमान्यता’ रहेको छ ।
सम्मेलनमा विभिन्न सत्रहरुमा गरिबी, आतंकवाद, विकास, सुशासन र सांसदहरुको भूमिका, अन्तरधार्मिक संगठन र नागरिक समाजको भूमिका, जलवायु परिवर्तन, सञ्चारमाध्यमको भूमिका, विश्वव्यापी शान्ति प्रक्रिया र शान्ति परियोजनालगायतका विषयमा छलफल हुने छ ।
विश्वका जल्दाबल्दा मुद्दा समाधान गर्न नविन सोच, सिर्जनशील, दूरदृष्टि राख्ने र साहसी नेतृत्वको आवश्यकता जस्ता विषयमा पनि बहस हुन आयोजक संस्था युनिभर्सल पिस फेडेरेसनले जनाएको छ ।