१४ असोज, काठमाडौं ।
नेपाल कम्युनिस्ट पार्टीका नेता एवं पोलिटब्यूरो सदस्य मोहनबहादुर कार्की ‘जीवन्त’ र कृष्णप्रसाद धमला ‘गम्भीर’लाई गैरकानूनी थुनामा राखेको भन्दै रिहाइको माग गर्दै सर्वोच्च अदालतमा दायर रिट निवेदनमाथि बहस भोलिमात्र हुने भएको छ ।
सरकारले गैरकानूनी रुपमा गिरफ्तार गरेर थुनामा राखेको भन्दै तत्काल थुनामुक्ता गराउन माग गर्दै धमलापुत्र चेतन शर्माले रिट निवेदन दर्ता गरेका थिए । यो रिट निवेदन चौथोपटक दायर गरिएको हो ।
नेता कार्की र धमलामाथि संखुवामाको अरुण तेस्रो जनविद्युत आयोजनमा स्थलमा बम विष्फोट गरेको आभियोग लगाइएको छ । साउन १० गते काठमाडौंको नागढुंगाबाट गिरफ्तार गरिएका दुवै नेतालाई यसअघि काभ्रेमा ‘संगठित अपराध’, नुवाकोटमा ‘आगजनी’ र दाङमा ‘बम विष्फोट तथा कर्तव्य ज्यान’को मुद्दा चलाइएकोमा सर्वोच्चले बन्दी प्रत्यक्षीकरण रिटमाथिको बहसपछि निर्दोष ठहर गर्दै रिहा गर्न आदेश दिएको थियो ।
तर रिहालगत्तै अर्को अभियोगमा विभिन्न जिल्ला घुमाउँदै आइरहेको छ । योपटक संखुवासभा जिल्ला प्रहरीले ‘विष्फोटक पदार्थ’मा मुद्दा चलाइएको छ । उनीहरुलाई सर्वोच्चको आदेशबमोजिम रिटमाथि बहसका लागि आजै आन्तरिक उडानबाट काठमाडौं ल्याइएको हो । मिसिल अध्ययनका लागि समय नपुगेको भन्दै रिट निवेदक पक्षका वकिलहरुले समय मागेपछि पेसी भोलि मात्र चढ्ने भएको जनाइएको छ ।
दुवै जना बन्दी नेतालाई आजको रात काठमाडौंमा राखिएको छ ।
भदौ १२ काठमाडौबाट गिरफ्तार भएकी नेकपाकै पोलिटब्यूरो सदस्य उमा भुजेल ‘शिलु’ काभ्रे, नुवाकोट र दाङमा सोही अभियोगमा निर्दोषा सावित भई गत असोज ७ गते र साउन २२ गते काठमाडौंको टौदहनजिक चाल्नाखेलबाट गिरफ्तार भएका नेकपाकै प्रवक्ता प्रकाण्ड दुई दिनपछि ९ गते रिहा भइसकेका छन् ।