३१ भदौ, काठमाडौं ।
नेपाल कम्युनिस्ट पार्टीका प्रवक्ता खडगबहादुर विश्वकर्मा ‘प्रकाण्ड’को गैरकानूनी थुना मुक्तको माग गर्दै सर्वोच्च अदालतमा बन्दीप्रत्यक्षीकरण रिट निवेदन फेरि दर्ता भएको छ ।
उक्त रिट प्रकाण्डका भाई वीरेन्द्र विश्वकर्माले आइतबार दर्ता गरेका हुन् । प्रकाण्डलाई सर्वोच्चको आदेशमा रिहा भएलगत्तै शुक्रबार साँझ सर्वोच्च परिसरबाटै गिरफ्तार गरी शुक्रबार राति सिन्धुली प्रहरीमा राखी हिजो शनिबार दिउँसो पौने १ बजे उदयपुर पुर्याइएको थियो ।
बन्दी प्रत्यक्षीकरण रिट दायर यो पाँचौ पटक हो । यसअघिका सबै बन्दी प्रत्यक्षीकरण रिटमा बहसपछि बन्दीलाई यथेष्ठ प्रमाण र वस्तुनिष्ठ आधारबिना थुना राखेर सरकारले गैरकानूनी कार्य गरेको ठहर गर्दै रिहाईको आदेश दिएको थियो ।
आजको रिटमा प्रकाण्डलाई गैरकानूनी रुपमा गिरफ्तार गरी थुनामा राखेको भन्दै थुनाबाट मुक्त गर्न माग गरिएको छ । उदयपुरमा नेता प्रकाण्डलाई कम विष्फोटको अभियोग लगाइएको छ । यसभन्दा पहिलेका काठमाडौं, काभ्रे, नुवाकोट, दाङलगायत जिल्लामा लगाइएको जबर्जस्त चन्दा संकलन, संगठित अपराध, बम विष्फोट, आगजनी अभियोगमा सफाई पाइसकेका छन् ।
नेकपाका स्थायी समिति सदस्य समेत रहेका प्रकाण्डलाई गएको साउन २२ गते पार्टी कामको सिलसिलमा हेटौंडाबाट काठमाडौं आउँदै गर्दा काठमाडौंको टौदहनजिक चाल्नाखेलबाट गिरफ्तार गरिएको थियो ।