काठमाण्डौ, २३ भदौ । भारत भ्रमणमा रहेका सत्तारुढ नेपाल कम्युनिष्ट पार्टी का अध्यक्ष पुष्पकमल दाहाल प्रचण्डले आज भारतीय प्रधानमन्त्री नरेन्द्र मोदीसँग भेटवार्ता गर्नु भएको छ ।
नयाँदिल्लीको लोकमान्य मार्गस्थित मोदी निवासमा भएको भेटमा दुई देशको आपसी सम्बन्ध र नेपालको आर्थिक विकासका लागि भारतले गर्ने सहयोग लगायत विषयमा छलफल भएको थियो ।
अध्यक्ष प्रचण्डले दिल्ली प्रस्थानअघि आफ्नो भ्रमण राजनीतिक भन्दा आर्थिक र द्धिपक्षीय सम्बन्धमा केन्द्रित रहने बताएपनि उहाँको उच्चस्तरीय भेटघाट विशेषगरी राजनीतिक मुद्दामा केन्द्रित रहेको स्रोतले जनाएको छ ।
मोदीसँगको भेट लगत्तै उहाँले भारतीय विदेशमन्त्री सुष्मा स्वराजसँग पनि आजै भेटवार्ता गर्नुभएको छ ।
यसअघि पूर्व प्रधानमन्त्री समेत ररहनुभएका प्रचण्डले भारतका गृह मन्त्री राजनाथ सिंह र राष्ट्रिय सुरक्षा सल्लाहकार अजित डोभलसगँ ‘वान इन वन’ भेट गर्नु भएको थियो ।
दाहाल आजै साँझ भारतीय जनता पार्टी निकट इण्डिया फाउण्डेशनको डिनर भेटमा समेत सहभागी हुनेछन् । भातको तीन दिने भ्रमणमा दिल्ली आएका दाहालको भोलि मध्याह्न नेपाल फर्किने कार्यक्रम छ ।