काठमाण्डौ, २१ भदौ ।
प्रधानन्यायाधीशमा सिफारिस ओमप्रकाश मिश्रको नाममा चारवटा उजुरी परेको संसद् सचिवालयले जनाएको छ ।
संसदीय सुनुवाइ समितिले तोकेको १० दिनको समयमा उक्त उजुरी परेको हो । उजुरीमाथि आइतबार बस्ने समितिको बैठकले कारवाही अगाडि बढाउने सचिवालयका सहप्रवक्ता केशव अर्यालले बताउनु भयो ।
संवैधानिक परिषद्ले ७ भदौमा वरिष्ठताका आधारमा मिश्रलाई प्रधानन्यायाधीशमा सिफारिस गरेको थियो। वरिष्ठ न्यायाधीश दीपकराज जोशीलाई संसदीय सुनुवाइ समितिले अस्वीकृत गरेपछि मिश्रलाई सिफारिस गरेको हो ।
प्रधानन्यायाधीशका लागि न्याय परिषद्ले जोशी, मिश्र र चोलेन्द्रशमशेर राणाको नाम सिफारिस गरेको थियो । प्रधानन्यायाधीश हुन सर्वोच्चमा तीन वर्ष काम गरेको हुनुपर्छ ।
१५ सदस्यीय संसदीय सुनुवाइ समितिको ‘सम्पूर्ण सदस्य संख्याको दुईतिहाइ बहुमतबाट अस्वीकृत नभएमा अनुमोदन भएको मानिने’ नियमावली उल्लेख छ । समितिका १५ मध्ये १० जना सदस्यले प्रस्तावित नाम अस्वीकृत नगरेमा संवैधानिक परिषद्ले सिफारिस गरेको नाम अनुमोदन हुनेछ ।
तर, समितिको सम्पूर्ण सदस्यको दुईतिहाइ बहुमतबाट अस्वीकृत भएमा प्रस्तावित नामको व्यक्ति सम्बन्धित पदमा नियुक्त हुन नसक्ने व्यवस्था छ ।