काठमाण्डौ, १८ भदौ ।
सर्वोच्च अदालतले प्रहरी हिरासतमा रहेका नेपाल कम्युनिस्ट पार्टीका पोलिट ब्यूरो सदस्य उमा भुजेल ‘शिलु’ र केन्द्रीय सदस्य टेकबहादुर केसी ‘आजाद’लाई लिखित जवाफ सहित यहि भदौ २१ गते अदालतमा उपस्थित गराउन आदेश दिएको छ ।
गैरकानुनी रुपमा थुनामा राखिएको भन्दै दायर भएको बन्दीप्रत्यक्षीकरण सम्बिन्धी रिट निवेदनमाथि आज सुनुवाई गर्दै अदालतले उनीहरुलाई पक्राउ गर्नुको लिखित कारणसहित बन्दीलाई उपस्थित गराउन आदेश दिएको हो ।
न्यायधिस आनन्दमोहन भट्टराईको एकल ईजलासमा आज भएको बहसपछि सर्वोच्चले लिखित जवाफ सहित बन्दीलाई अदालतमा उपस्थित गराउने सरकारको नाममा आदेश दिएको छ ।
भुजेलको हकमा प्रतिमा भुजेल र केसीको हकमा कृष्णबहादुर विश्कर्माले आइतबार रिट दर्ता गराएका थिए । रिट निवेदनमा दुवै नेतालाई तुरुन्त रिहाईको माग गरिएको छ ।
नेकपाकी नेतृ भुजेललाई हालै काठमाडौंको वनस्थलीबाट गिरफ्तार गरी काभेपलाञ्चोक जिल्ला प्रहरी कार्यालय धुलिखेल राखिएको छ भने नेता केसीलाई भक्तपुरबाट गिफ्तार गरी अनुुसन्धानका लागि भन्दै भक्तपुरको जगाती प्रहरी हिरासतमा राखिएको छ ।