दाङ, भदौ ८ ।
माग अनुसारको सुन सरकारले उपलब्ध गराउन नसकेको भन्दै आज देखि दाङका सुनचाँदी पसल बन्द भएका छन् ।
नेपाल सुनचाँदी व्यावसायी संघ, दाङको घोराहीमा बसेको बैठकले आज देखि पर्सी आइतबारसम्म सुनचाँदी पसल बन्द गर्न निर्णय गरेको नेपाल सुनचाँदी व्यावसायी संघ, दाङका अध्यक्ष विनोद विश्वकर्माले जानकारी दिनुभयो ।
बजारमा सुनको माग अत्याधिक बढेको बताउँदै सुनको अभाव हुँदा माग अनुसारको सुन ग्राहकलाई उपलब्ध गराउन नसक्दा पसल बन्द गर्न लागेको अध्यक्ष विश्वकर्माले जानकारी दिनुभयो ।
व्यवसायीहरुले सरकारले सुनमा सिन्डिकेट लगाएको हुँदा पछिल्लो समय सुन अभाव देखिएको बताउँदै तत्काल सिन्डिकेट खारेजीको माग गरेका छन् ।
चार्डपर्व नजिक आउँदै गर्दा सुनका गरगहना अत्यधिक माग भैरहेको छ । सरकारले व्यापारीलाई समयमै सुन उपलव्ध गराउन नसक्दा समस्या भएको व्यवसायीको भनाई छ ।
