काठमाडाैं, २४ साउन ।
नेपाल कम्युनिस्ट पार्टी (नेकपा)का प्रवक्ता प्रकाण्डकाे गिरफ्तारीकाे चाैतर्फी विराेध र भण्डाफाेर भएकाे छ । यसै क्रममा नेपाल कम्युनिस्ट पार्टी (माओवादी केन्द्र)ले नेपाल कम्युनिस्ट पार्टीका प्रवक्ता प्रकाण्डलाई गिरफ्तार सरकारले जनविरोध कार्य गरेको बताएको छ ।
पार्टीका महासचिव कर्णजीत बुढाथोकी ‘शुसिल’ ले विहीबार विज्ञप्ति जारी गरेर प्रबक्ता प्रकाण्डको गिरफ्तारीले सरकारको परिवर्तन विरोधी चरित्र उदाङ्गिएको बताए ।
“देश, जनता र वर्गको निम्ति गरिएको राजनीतिक आन्दोलन र उक्त आन्दोलनमा समाहित नेता कार्यकर्ताहरुलाई गिरफ्तार गरिनुले केपी ओली सरकारको जनविरोध। परिवर्तन विरोध चरित्र उदाङ्गिएको छ । नेकपाको पार्टी प्रबक्ता कमरेड प्रकाण्डलगायत अन्य दुई जनालाई गरिएको गैरकानुनी गिरफ्तारीलाई हाम्रो पार्टी घोर भत्सर्ना गर्दछ” विज्ञप्तिमा भनिएको छ । देशमा भ्रष्टाचार, बलात्कार, अपहरण, सीमा अतिक्रमण जस्ता समस्याले देश आक्रान्त पारेको बताउँदै त्यसको समाधान गर्नुको साटो राजनीतिक आन्दोलनमा लागि रहेका नेताहरुलाई गिरफ्तार गरिरहेको भन्दै शुसिलले सरकारको विरोध गरेका छन् ।
महासचिव शुसिलले प्रबक्ता प्रकाण्डलाई सरकारले गैरकानुनी रुपमा गिरफ्तार गरेको भन्दै रिहाईको माग गरेका छन् ।
यस्तै , ऋषिराम कट्टेल नेतृत्वकाे नेपाल कम्युनिस्ट पार्टीले पनि प्रवक्ता प्रकाण्डकाे गिरफ्तारीकाे विराेध गरेकाे छ ।
साे पार्टीका अध्यक्ष ऋषिराम कट्टेलले नेकपाका प्रवक्ता प्रकाण्डलागायत नेताहरुको गिरफ्तारीको निन्दा तथा विरोध गरेका छन् । अध्यक्ष कट्टेलले बुधबार प्रेस वक्तव्य जारी गदै प्रवक्ता प्रकाण्डसहित सबै गिरफ्तारीमा परेका नेताकार्यकर्ताको बिनाशर्त रिहाइको जोडदार माग गरेका हुन् ।
कट्टेलले विप्लवलगायतका नेता–कार्यकर्ताहरुलाई वारेन्ट जारी गर्ने र शान्तिपूर्ण कार्यक्रमहरुमाथि प्रहरी हस्तक्षेप गर्ने जस्ता कुकार्य रोक्न समेत सरकारलार्इ आग्रह गरेका छन् । आमुल परिवर्तनको निम्ति संयुक्त जन संघर्षलाई अघिडाउन उत्पीडित वर्ग तथा समुदायका जनतालगायत सबै न्यायप्रेमी जन समुदायलाई अध्यक्ष कट्टेलले अपिल गरेका छन् ।
अध्यक्ष कट्टेलद्धारा जारी विज्ञप्तिमा भनिएको छ- ‘विप्लव नेतृत्वको कम्युनिष्ट पार्टीका केन्द्रीय नेता तथा पार्टीका प्रवक्ता क. प्रकाण्ड (खडग बाहादुर विस्वकर्मा) लाई फासिस्ट ओली सरकारले गिरफ्तार गरी अमानवीय यातना साथ राखेको कुरा सार्वजनिक भएको छ । प्रकाण्ड मात्र हैन यो पार्टीका थुप्रै नेता–कार्यकर्ताहरु दलाल सरकारको जेलमा रहेका छन् वा अनेकन झुटटा मुद्दा खेपिरहेका छन् । ओली सरकारको यस्तो कुकृत्यको नेपाल कम्युनिष्ट पार्टी घोर निन्दा र विरोध गर्दछ र प्रकाण्डलगायत सबै गिरफ्तार कमरेडहरुलाई बिनासर्त तत्काल रिहाई गर्न जोडदार माग गर्दछ । साथै, विप्लवलगायतका नेता–कार्यकर्ताहरुलाई वारेन्ट जारी गर्ने र त्यसपार्टीले गर्ने शान्तिपूर्ण कार्यक्रमहरुमाथि समेत हस्तक्षेप गर्ने कुकार्य समेत रोक्न नेकपा आग्रह गर्दछ । जनताका आवाजहरुलाई दमनको सहारावाट दवाउन सकिन्छ भन्ने दुस्वप्न नदेख्न ओली र यिनका दलालहरुलाई नेकपा सचेत गराउछ र आमुल परिवर्तनको निम्ति संयुक्त जन संघर्षलाई अघिडाउन उत्पीडित वर्ग तथा समुदायका जनता लगायत सबै न्यायप्रेमी जन समुदाय लाई अपील गर्दछ ।’