काठमाडौं, १० साउन ।
प्रधानमन्त्री केपी शर्मा ओलीले इमान्दार भएर राष्ट्र सेवामा समर्पित हुन निजामती सेवाका कर्मचारीहरुलाई निर्देशन दिनुभएको छ ।
नेपाल प्रशासनिक प्रशिक्षण प्रतिष्ठानको ३९ औं आधारभूत प्रशिक्षण समापन कार्यक्रममा प्रधानमन्त्री ओलीले प्रशासनिक सेवामा भइरहेको ढिलासुस्ती र सेवाग्राहीका गुनासालाई समाधान गर्न कर्मचारीहरुलाई निर्देशन दिनुभएको हो ।
प्रशासनिक क्षेत्रमा अझैपनि भ्रष्टाचार र ढिलासुस्ती जस्ता समस्या समाधान नभएको भन्दै उहाले उत्तरदायी र पारदर्शी भएर काम गर्न कर्मचारीलाई आग्रह गर्नुभएको छ ।
उहाले राष्ट्रिय सेवामा आफुलाई प्रवेश गराउनु छ भने जनताको सेवकको रुपमा आफुलाई प्रस्तुत गर्न सबै कर्मचारीको ध्यानाकर्षण गराउनु भएको छ ।
कार्यक्रममा संघीय मामिला तथा सामान्य प्रशासनमन्त्री लालबाबु पण्डित, मन्त्रालयका सचिव दिनेशकुमार थपलिया, प्रतिष्ठानका कार्यकारी निर्देशक पुण्यप्रसाद न्यौपानेले दीक्षित कर्मचारीलाई कार्यक्षेत्रमा सफल हुन बधाई दिनुभएको थियो ।
गत २०७४ पुस १७ देखि सञ्चालित उक्त प्रशिक्षणमा नेपाल प्रशासन सेवा, सामान्य प्रशासन समूहमा नवनियुक्त २१७ अधिकृत सहभागी थिए ।