काठमाडौं, साउन ९ ।
चिकित्सा शिक्षा सुधारको माग राख्दै अनसनरत प्रा डा गोविन्द केसी पक्ष र सरकारी पक्षबीच आज पनि वार्ता हुने भएको छ ।
गएराति अबेर सम्म चलेको वार्तामा दुवै पक्ष केहि लचक भएसँगै आजको वार्ताको माध्यमबाट सहमतिको पहल खोजिने बताइएको छ ।
विहान ९ बजे पछि शिक्षा मन्त्रालयमा हुने वार्तामा बाँकी विषयमा सझदारी जुटाउने प्रयास गरिने सरकारी वार्ता टोलीका संयोजक एवं शिक्षा, विज्ञान तथा प्रविधि सचिव खगराज बरालले जानकारी दिनुभयो ।
डा केसी पक्षले सरकारी वार्ता टोलीसँग म्यान्डेट नभएको भन्दै वार्तामा बस्न अस्विकार गर्दै आए पनि सरकारले माग संबोधनका लागि अग्रसरता देखाएपछि ५ दिन देखि अवरुद्ध वार्ताले गति हिजोबाट पाएको हो ।
सरकारी वार्ता टोलीका संयोजक बरालले प्रेस वक्तब्य जारी गर्दै आज वार्ता हुने जनाउनु भएको हो । वक्तब्यमा धेरै कुरा सहमति नजिक पुगेको जनाइएको छ ।
डा. केसीको वार्ता टोलीले संसदमा विचाराधीन चिकित्सा शिक्षा विधेयक फिर्ता गर्नुपर्ने पूर्वशर्त छाडेपछि सरकारी टोलीसँग छलफल सुरू भएको हो ।