काठमाडौं, असार २५ ।
क्रस बोर्डर रेल कनेक्सन तथा जनकपुर–जयनगर रेल सञ्चालनको मोडालिटीबारे नेपाल र भारतीय रेल विभागका अधिकारीबीच आज छलफल हुदैछ ।
काठमाडौंको एक होटलमा मध्यान्ह १२ बजेपछि हुने छलफलमा निकट भबिश्यमा रेल सेवा सञ्चालन गर्ने तयारी भएको परियोजना र ५ वटा क्रस बोर्डर परियोजनाबारे छलफल हुने रेल विभागका सुचना अधिकारी प्रकाशभक्त उपाध्यायले जानकारी दिनुभयो ।
त्यसका लागी ७ सदस्य भारतीय टोली हिजो काठमाडौं आएको छ । यसअघि पनि बिभिन्न चरणमा छलफल गरेको भारतीय टोलीले आगामी माघबाट सञ्चालन गर्ने तयारी गरेको जनकपुर–जयनगर परियोजनाबारे निर्णायक छलफल गर्नेछ ।
सो परियोजनामा भारतबाट रेल लिजमा लिएर सञ्चालन गर्ने गरी नेपाली पक्षले तयारी गरेको छ । त्यःतै प्राबिधिक तथा दक्ष प्रशिक्षकको उपलब्धताका बिषयमा पनि नेपाली पक्षले भारतीय अधिकारीसँग कुरा राख्ने जनाएको छ ।
भोलीसम्म चल्ने छलफलमा यसअघिका छलफलमा पूर्णता पाउन नसकेका बिषयमा पनि दुई देशीय प्रतिनिधि मण्डलबिच छलफल हुने सुचना अधिकारी उपाध्ययले जानकारी दिनुभयो ।
