२१ असार, काठमाडौं ।
भूकम्पपीडितहरुका विषयमा छलफल गर्नका लागि बोलाईएको राष्ट्रिय पुनर्निर्माण प्राधिकरण परामर्श समितिको पूर्व निर्धारित बैठक स्थगित भएको छ ।
प्रधानमन्त्रीको सचिवालका कर्मचारीहरुले पूर्वनिर्धारित कार्यतालिका अनुसार नै आज बिहान प्रधानमन्त्री निवास बालुवाटारमा पुगेका प्राधिकरणका सीईओ युवराज भुसालसहितको टोलीेलाई बैठक स्थगित भएको सुचना दिएका हुन् ।
भुसाललाई मन्त्रिपरिषद बैठकले पुनर्निर्माण प्राधिकरण प्रमुखको नियुक्ति खारेज गरेको जनाउ दिएर बैठक स्थगित भएको सूचना दिइएको जनाईएको छ । त्यसपछि भुसाललाई प्रधानमन्त्री ओलीसँग भेट गर्न नै नदिईएपछि अपमानजनक रुपमा उहाँ वालुवाटारबाट बाहिरिनुभएको छ ।
प्रधानमन्त्रीको नेतृत्वमा बस्नुपर्ने सो बैठकमा भूकम्प प्रभावित १४ जिल्लामा सांसदहरुसमेत सहभागी हुने कानूनी व्यवस्था छ ।
भूकम्पपीडितहरुका विषयमा छलफल गर्नका लागि परिषदको बैठक बालुवाटारमा विहीबार बिहान १० बजे बस्ने केही दिनअघि नै तय भएको थियो । परिषदको बैठक बिहीबार बसेपछि असार २४ गते निर्देशक समितिको बैठक राख्ने सीईओ भुसालको तयारी थियो ।
एमाले नेताहरुले पुर्निर्माण प्राधिकरणमा देउवा सरकारले कांग्रेस नेता रामचन्द्र पौडेलका सम्धीलाई नियुक्त गरिएको भन्दै विरोध जनाउँदै आएका थिए । यद्यपि, प्राधिकरणका सीईओ भुसाल पूर्वसचिवसमेत भएकाले कुशल प्रशासकमा चिनिनुहुन्छ ।
उहाँले आफू रामचन्द्र पौडेलको सम्धी भएका कारणले नभई आफ्नै क्षमताले यो ठाउँसम्म आइपुगेको भुसालले बताउँदै आउनुभएको थियो ।
ओली सरकार गठन भएको ४ महिनासम्म पनि भुसाललाई नहटाई प्राधिकरणको काम अघि बढाइएको थियो । भूकम्प पुनर्निर्माण प्राधिकरणमा प्रधानमन्त्रीको नेतृत्वदायी भूमिका रहन्छ । यसको कार्यकारी नेतृत्व सीईओमा रहने प्रावधान छ ।
