सीताराम ओझा/१६ असार,धनगढी । बजेट सक्न असारमा झारा टार्न विकास हुँदै आएको छ । असारमा गरिएको विसका बढीमा महिना दिन पनि नटिक्ने भन्दै जनस्तरबाटै विरोध भइरहेपनि यो रोकिएको छ । विकास थोरै बजेट लगाउने र बाँकी रकम सबै मिलेर कुम्ल्याउने भएकोले असारे विकास रोक्नुपर्ने माग भइरहेको छ ।
जति विरोध हुँदा पनि असारे विकास रोकिएको छैन । जुन एक महिना पनि टिक्दैनन । यसैबीच प्रदेश नम्बर सातको राजधानीमै गरिएको विकास महिना दिन नपुग्दै भत्किएको छ ।
धनगढी उपमहानगरपालिका सघन शहरी विकास कार्यक्रम अन्तर्गत निर्माण भइरहेको सडकमा बनाइएको नाली महिना दिन नपुग्दै भत्किएको छ । वडा नम्वर ४ को तुलसी टोल– भगवती टोल–कैलाली गाउँ जोड्ने सडकमा निर्माण गरिएको पानी निकासको नाली बनेको एक महिना नपुग्दै भत्किएको हो । १७ सय मिटर लम्बाईको सडकमा बनाइएको नाली भत्किएको स्थानीय बताएका छन् । नाली निर्माणमा लापरवाही र गुणस्तरहीन सामाग्रीको प्रयोग भएको स्थानीयको भनाई छ ।
सघन शहरी विकास कार्यक्रमको प्याकेज ८ मा तुलसी टोल– भगवती टोल–कैलाली गाउँ सडकसँगै पिपलचौतारा– जाई–मटीयारी र जाली–विजुलीया गरी तीन सडक निर्माणको काम पिएस–एडभेन्सर–रोयल जेभीले ९ करोड ९४ लाखमा ठेक्का सम्झौता गर्दै काम गरिरहेको छ । तर नाली भत्किएको बारेमा आफुहरुलाई थाहा नभएको सो सडक निर्माणको जिम्मा लिएका टेकबहादुर मल्लले बताए ।
योजनाको नियमन गर्ने जिम्मा पाएको शहरी विकास तथा भवन निर्माण विभाग डिभिजन कार्यालय धनगढी पनि यस बारेमा अनविज्ञ रहेको छ । सघन शहरी विकास कार्यक्रम हेरिरहेका इन्जिनियर उमेश चौधरीले नाली भत्किएको बारे जानकारी नआएको र अब फिल्डमा गएर अनुगमन गर्ने जानकारी दिए ।
