काठमाडौं, जेठ २३ ।
सरकारको पछिल्लो निर्णयमा आपत्ति जनाउँदै सेयरबजार लगानीकर्ताहरुले धितोपत्र बोर्डमा धर्ना दिएका छन् । लगानीकर्ताहरुले आज बिहान १० बजेदेखि १०ः३० बजेसम्म धितोपत्र बोर्डको कार्यालय, जावलाखेलमा धर्ना दिएका हुन् ।
धर्नाका लागि पुगेका संघका पदाधिकारी, सदस्य तथा लगानीकर्ताहरुलाई प्रहरीले मूलद्वारबाट प्रवेश गर्न रोक लगाएसँगै लगानीकर्ताहरुले गेटमै बसेर धर्ना दिएका हुन् ।
हालैमात्रै सरकारले बोनस र हकप्रद शेयरमा अंकित मूल्यलाई आधार मानेर पुँजीगत लाभकर असुल्नु भनेर धितोपत्र बोर्ड, नेप्से तथा सिडिएसीलाई निर्देशन दिएको छ । उक्त निर्देशनको विरोधमा सेयर लगानीकर्ताहरू केही दिनयता देखि लगातार विरोधमा उत्रिएका हुन् ।
लगानीकर्ता संघका अध्यक्ष उत्तम अर्याललका अनुसार आज पनि प्रत्येक ब्रोकर कार्यालायमा गएर कारोबार रोक्ने र धर्ना दिने उनीहरुको योजना छ ।
आन्तरिक राजस्व विभागले जारी गरेको पत्रले आम लगानीकर्ताको भावनामा गम्भीर असर पार्नुका साथै करको सर्वमान्य सिद्धान्तलाई नै अपमान गरेको उनीहरुको ठहर छ ।
