काठमाडौं, जेष्ठ २३ ।
अर्थमन्त्री युवराज खतिवडाले भूकम्पपछिको पुनर्निर्माणमा जनप्रतिनिधिलाई समेत साथमा लिन राष्ट्रिय पुनर्निर्माण प्राधिकरणलाई आग्रह गर्नुभएको छ ।
आज काठमाडौंमा निजी आवास पुनर्निर्माण समस्या पहिचान र समाधान नामक कार्यशाला उद्घाटन गर्दै उहाँले पुनस्निर्माणमा रहेका कमजोरी औल्याई लक्ष्य अनुसार कार्य गर्न जनप्रतिनिधिको सहभागितामा जोड दिनुभएको हो ।
पुनर्निर्माणमा हातेमालो गरेका राष्ट्रिय तथा अन्तराष्ट्रिय संघसंस्था तथा दातृ निकायलाई समेत साथमा लिन अर्थमन्त्री खतिवडाको सुझाव थियो ।
पुनर्निर्माणमा देखिएको समस्या समाधानका लागि सरकार गम्भीर रहेको उल्लेख गर्दै उहाँले सोबारे जानकारी गराउन आग्रह गर्नुभयो । पुनर्निर्माण खर्च पारदर्शी बनाउन सुझाव दिदै खतिवडाले सरल र सुलभ बैंकिङ प्रणाली अपनाउन आवश्यक रहेको उल्लेख गर्नुभयो ।
कार्यक्रममा राष्ट्रिय पुनस्निर्माण प्राधिकरणका प्रमुख कार्यकारी अधिकृत (सिईयो ) युवराज भुषालले ४६ हजार व्यक्ति सहित काठमाडौं उपत्यकामा रहेका १ लाख २ हजार पीडितमध्ये १० हजार घर, मन्दिर, ऐतिहासिक सम्पदा लगायत पुनर्निर्माण भएको जानकारी दिनुभयो ।
सिईयो भुषालले जनप्रतिनिधिको सहभागितामा काठमाडौंमा पुनस्निर्माणको कार्य गरिरहेको बताउनुभयो । पुनर्निर्माणमा देखिएका समस्या र समाधानका उपाय लगायत बिषयबारे कार्यशालामा छलफल भईरहेको छ ।
