काठमाडौँ, २१ जेठ ।
प्रतिनिधिसभाको आजको बैठकले विनियोजन विधेयक, २०७५ लाई सर्वसम्मतिले पारित गरेको छ ।
बैठकमा अर्थमन्त्री डा युवराज खतिवडाले सो विधेयक पारित गरियोस् भनी प्रस्ताव राख्नुभएको थियो ।
बैठकमा प्रतिनिधिसभा नियमावली, २०७५ को प्रस्ताव भने प्रस्तुत हुन सकेन । प्रतिनिधिसभाको अर्काे बैठक यही जेठ २५ गते दिउसो १ बजे बस्नेछ ।
यसअघि प्रतिनिधिसभा बैठकको विशेष समयमा बोल्दै सांसदहरुले प्रधानमन्त्री केपी शर्मा ओलीको चीन भ्रमणबारे जानकारी माग गरेका छन् ।
प्रमुख प्रतिपक्ष दल नेपाली कांग्रेसले ओलीको आसन्न चीन भ्रमणबारे संसदलाई जानकारी गराउन माग गरेको हो ।
कांग्रेस सांसद दिलेन्द्रप्रसाद बडूले प्रधानमन्त्री ओलीको आसन्न चीन भ्रमण र भ्रमणकाक्रममा दुई देशबीच हुने छलफलका एजेन्डाबारे जानकारी गराउन माग गर्नुभयो ।
उहाँले भारत र चीनसँग सीमा जोडिएको दार्चुला जिल्लालाई त्रिदेशीय व्यापारिक केन्द्र निर्माणका लागि एजेन्डा तय गर्नसमेत आग्रह गर्नुभयो ।
यस्तै सत्तारुढ नेपाल कम्युनिस्ट पार्टी (नेकपा) की सांसद पम्फा भुसालले सरकारले यातायात क्षेत्रको ‘सिन्डिकेट’ अन्त्यको घोषणा गरेपनि अझै सार्वजनिक यातायात क्षेत्र सुधार हुन नसकेको भन्दै सरकारको ध्यानाकर्षण गराउनु भयो ।
उहाँले निर्माणधीन चक्रपथ अवैज्ञानिक भएकाले वैज्ञानिक तरिकाले चक्रपथ सडक निर्माण गर्नुपर्ने बताउनु भयो ।
यस्तै, राजपा नेपालका सांसद महेन्द्रराय यादवले तराई–मधेसमा विद्यमान नागरिकताको समस्या तत्काल समाधान गर्न र तराईमा हुने गरेको डुबान समस्याको पूर्वतयारी गर्न सरकारको ध्यानाकर्षण गराउनु भयो ।
नेमकिपामा सांसद प्रेम सुवालले चेलिबेटी बेचबिखन अन्त्य गर्नका लागि कठोर कदम चाल्न सरकारलाई आग्रह गर्नुभयो ।
सांसद कलुदेवी विश्वकर्माले आफू दलित भएकै कारण काठमाडौंमा कोठा नपाएको गुनासो गर्नुभयो ।
उहाँले व्यवहारमै छुवाछूतको अन्त्य गर्न सरकारको ध्यानाकर्षण गराउनु भयो ।
