काठमाडौ २० जेठ ।
पाल्पामा गत शुक्रबार भएको सवारी दुर्घटनामा मृत्यु भएकाहरुको सम्झनामा आज उद्योगधन्दा, पसल व्यवसाय बन्द गरिएको छ ।
पाल्पा उद्योग बाणिज्य संघको अगुवाईमा व्यापारी, व्यवसायीहरुले पसल व्यवसाय बन्द गरेका हुन् । पसल व्यवसाय बन्द गरेर शोकसभाको आयोजना गरिएको संघका अध्यक्ष मोहन श्रेष्ठले जानकारी दिनुभयो ।
अध्ययन भ्रमणका लागि तानसेनबाट रामपुर जाँदै गरेको लक्ष्मी बचत तथा ऋण सहकारी संस्थाका पदाधिकारी, सदस्य एवं कर्मचारी सहित अतिथि चढेको बस रम्भा गाउँपालिका ४ हुमिनको धारदीमा दुर्घटना हुँदा १४ जनाको मृत्यु भएको थियो ।
११ जनाको घटनास्थलमै र ३ जनाको उपचारका क्रममा मृत्यु भएको हो । दुर्घटनामा परी घाइते भएका ४ जनाको काठमाडौं र ५ जनाको मिसन अस्पताल पाल्पामा उपचार भैरहेको छ ।
दुर्घटनामा ज्यान गुमाएका १४ मध्ये १३ जनाको हिजो राम्दीघाटमा अन्त्येष्टी गरिएको थियो ।
